Ministra Finansa ein ezersísiu, Sara Lobo Brites. Imajen Tatoli Tatoli/Egas Cristovão

DILI, 25 abríl 2020 (TATOLI)Konsellu Jestaun Fundu COVID-19 liuhosi reuniaun ba datoluk, aprova proposta ba programa no sub-programa sira ne’ebé mak hetan ona apresiasaun husi Komisaun Interministeriál no Konsellu Ministru iha loron hirak liubá.

Ministra Finansa ein Ezersísiu, Sara Lobo Brites, relata Sekretariadu Tékniku fasilita enkontru Konsellu Jestaun Fundu COVID-19 hodi halo aprovasaun urjente ba programa, sub-programa no orsamentu ne’ebé maka prepara husi Sentru Integradu Jestaun Krize (CIGC,sigla portugés).

“Diskusaun kona-ba programa ein jerál, programa sira ne’ebé aprezenta komisaun jestaun fundu integra hotu kedas ninia orsamentu iha sistema, iha mós proposta balun ne’ebé mak presiza atualiza hodi bele hetan ninia informasaun detallu husi ministériu implementadór no mós presiza hetan autorizasaun ba fali sentru integradu”, informa Sara Lobo hafoin reuniaun Konsellu Jestaun Fundu COVID-19 iha Salaun Ministériu Finansa, Aitarak-laran, sábadu ne’e.

Ajenda ne’ebé diskute no ikus hetan aprovasaun iha Konsellu Jestaun ne’e maka kona-ba proposta husi MNEK, ba atribuisaun subsídiu ba estudante naun bolseiru sira iha rai-li’ur.

“Entaun konsellu aprova de’it ninia montante globál ne’ebé mak prevee tiha ona programa no sub-programa maibé sei nafatin presiza desizaun ba atrubuisaun kada estudante tuir kustu vida iha nasaun ida-idak”, nia realsa.

Bainhira Konsellu no Sekretariadu Tékniku atu halo verifikasaun ba verasidade husi dadus, maka Sekretariadu mós sei prepara mekanizmu pagamentu ba benefisiáriu sira.

Aleinde ne’e, konsellu aprova mós fatura husi servisu aérea.

“Iha kazu ne’e mak Airnorth ho baze kontratu ne’ebé mak Ministériu Tranporte no Komunikasaun (MTK) no Airnorth rasik maka asina tiha ona iha semana hirak liubá hodi asegura konetividade no mós transportasaun esensiál sira, husi akizasaun ne’ebé Governu rasik iha atubele halo prevensaun ba COVID-19.

Atuál Vise Ministra Finansa ne’e subliña, konsellu inklui ona iha proposta kona-ba sub-programa atribuisaun subsídiu $100 ba uma-kain sira ba iha orsamentu, tanba ida-ne’e presiza halo ajustamentu ho sentru integradu sira tanba ida ne’e iha ona desizaun husi KM, maibé ninia montante osan loloos sei hein Ministériu Solidaridade Sosiál no Inkluzaun (MSSI), Ministériu Administrasaun Estatál (MAE) no Ministériu Finansa (MF) sei halo levantamentu urjente ba dadus sira ne’e mak bele determina uma-kain no mós montante osan ne’ebé maka presiza hodi kobre despeza.

Fundu COVID-19 Iha Programa Tolu

Iha fatin hanesan, Koordenadór Jerál Sekretariadu Konsellu Jestaun Fundu COVID-19, Januario da Gama, akresenta iha programa importante tolu ba fundu COVID-19 ninian.

Programa dahuluk mak prevensaun no metigasaun ba COVID-19, ne’ebé liga liu ba iha atividade sira ne’ebé relasiona ho prevensaun no metigasaun husi liña sektorál sira.

Programa daruak maka aumenta sustentabilidade produsaun no produtividade ne’e liga liu ba setór agrikultura ninian, atu haree situasaun pandemia ne’e bainhira lori ba tempu naruk entaun tenke intervensaun Ministériu Agrikultura no Peska (MAP) nian atu halo produsaun iha setór agrikultura nian enkuadra mós iha fundu COVID-19.

Programa datoluk maka asesu ba produtu alimentár no alimentasaun serbisu, ne’ebé liga liu atu halo akizasaun ba foos hodi halo intervensaun ba merkadu karik Governu tenke halo subsídiu ba komunidade, ne’e ninia despeza orsamentu enkuadra hotu iha fundu ne’e rasik.

“Konselllu Jestaun aprova programa tolu ne’e hodi orienta Sekretáriu Tékniku hodi hahú ensera iha performance base system no GRP, no semana oin kada tersa, Konsellu Jestaun liuhosi sekretariadu bele notifika ona ministériu no instituisaun sira hodi aprezenta ona pedidu kabimentasaun ho planu despeza”, nia esplika.

Atuál Diretór Jeral Finansa Planeamentu no Orsamentu Estadu MF ne’e adiata, husi programa sira ne’ebé aprova ona iha ministériu ida-idak tenke mai ho ninia planu despeza ka pedidu kabimentasaun orsamentu, nune’e ekipa téknik husi sekretariadu bele halo verifikasaun no aprezenta filafali ba Konsellu Jestaun hodi halo aprovasaun hafoin Sekretariadu Tékniku halo prosesu pagamentu husi pedidu sira ne’ebé maka ministériu no instituisaun sira aprezenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here