Portavós CIGC, Odete Viegas. Imajen/Egas Cristovão

DILI, 25 abríl 2020 (TATOLI)–Koordenadora Ligasaun Forsa Terefa no Portavóz Sentru Integradu Jestaun Krize (CIGC, sigla portugés), Odete da Silva Viegas, ohin, atualiza situasaun nasionál kazu COVID-19 ho totál kazu konfirmadu COVID-19 mantein na’in-24 no na’in-lima (5) rekuperadu ka kuradu. Nia informa, rekoperadu ka kuradu na’in-lima ne’ebé mak foin daudaun ne’e hosi provável na’in-haat no pozitivu ida (1) ne’ebé kompleta ona teste laboratóriu.

“Rekoparadu ka kuradu na’in-lima ne’ebé mak foin daudaun hosi provável na’in-haat (4) no pozitivu na’in-ida (1) kompleta ona sira-nia teste laboratóriu daruak tutuir malu negativu no daudaun ne’e ita fó sira fila bá sira-nia família,” dehan Koordenadora Ligasaun Forsa Terefa no Portavóz, Odete da Silva Viegas, ba jornalista sira liuhusi konferénsia imprensa iha Sala Situasaun Centro Integrado Gestão de Crise (SS-CIGC), Sentru Konvensaun Dili (CCD, sigla portugés) Merkadu Lama, Dili, sábadu ne’e.

Nia hatutan, totál kazu rekoperadu ka kuradu daudaun ne’e hamutuk na’in-neen (6) ne’ebé na’in-lima horisehik rekopera no na’in-ida (1) kazu primeiru nian. To’o oras ne’e, númeru mate seidauk iha.

Iha konferénsia imprensa ne’e,  nia haktuir, totál númeru teste na’in-409 (horsisehik 392), totál rezultadu laboratóriu pendente hamutuk na’in-18 (horiseik iha na’in-21), totál kazu konfirmadu mantein na’in-24, totál kazu foun na’in-ida (1), totál rezultadu laboratóriu negativu na’in 367 (horisehik 347).

Aleinde ne’e, nia hatutan, totál profisionál Saúde, iha kuarentena hamutuk na’in-23, mantein hanesan horisehik. Totál ema iha konfinamentu obrigatóriu hamutuk na’in-422 ne’ebé ema na’in-72 husi munisípiu no na’in-289 hosi Dili, auto kuarentena na’in-61 ne’ebé iha munisípiu na’in-49 no na’in-12 iha Dili.

Nia informa, totál ema sira ne’ebé pasa ona loron 14 iha konfinamentu obrigatóriu hamutuk ema na’in-1680 ne’ebé ema na’in-340 iha munisípiu no ema na’in 1340 iha Dili.

Portavóz ne’e mós esplika, kazu konfirmadu no provável ne’ebé agora Timor-Leste iha sei nafatin, sei restritu ba grupu “cluster” neen (6) hanesan informa ona horisehik.

Entretantu, nia haktuir, kazu rekuperadu ka kuradu na’in-lima iha loron ohin mai husi Hotel Katuas hamutuk na’in-rua (2) no Hotel Fortuna hamutuk na’in rua (2) no Hotel Novo Horizonte ema na’in-ida (1).

Ida-ne’e, nia esplika, atu hatudu mós katak esforsu tomak ne’ebé mak Governu liuhosi Ministériu Saúde, Ekipa Traballu Sentru Integradu Jestaun Krize hamutuk ho liña minsiteriál hotu, parseiru sira no konfisaun relijiozu tomak halo mak ohin loron Timor-Leste bele fó filafali ema hirak-ne’e ba iha sira-nia familia no ba komunidade.

“Husu nafatin ba família no komunidade atu nafatin koopera no labele diskrimina sira tanba virus ne’e laiha ona no sira bá família atubele hala’o nafatin vida normál no nafatin mantein medida prevensaun sira ne’ebé hato’o tiha ona ba sira,” nia esplika.

Tanba ne’e, hodi Governu nia naran, nia hakarak kongratula ba profisionál saúde sira ne’ebé mak durante ne’e hala’o sira-nia knaar, tantu iha fatin izolamentu iha Dili no mós ema sira ne’ebé halo esforsu tomak hala’o triajen iha munisípiu hotu-hotu inklui Ospitál Referál sira iha territóriu Timor-Leste.

Notísia Relevante: COVID-19 Aumenta Kazu Konfirmadu Ida, Rekupera Na’in Rua

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here