Ministra Finansa ein ezersísiu, Sara Lobo Brites. Imajen Tatoli/Egas Cristovão

DILI, 25 abríl 2020 (TATOLI) – Atu promove transparénsia, Governu liuhosi Konsellu Jestaun Fundu COVID-19 sei partilla rezultadu ezekusaun fundu ba entidade relevante sira.

Ministra Finansa ein ezersísiu, nu’udar mós Prezidente Konsellu Jestaun Fundu COVID-19, dehan konsellu deside ona katak relatóriu ezekusaun Fundu COVID-19 tenke partilla ba entidade sira nune’e bele halo mós fiskalizasaun.

“Konsellu Jestaun mós deside katak iha relatóriu ezekusaun fundu nian sei partilla ba entidade sira ne’ebé maka halo mós fiskalizasaun ba iha ezekusaun Fundu COVID-19 atu promove transparánsia ba ezekusaun ne’e rasik”, relata Ministra Sara Lobo hafoin reuniau Konsellu Jestaun Fundo COVID-19 iha Salaun Ministériu Finansa, Aitarak-laran, sábadu ne’e.

Atuál Vise-Ministra Finansa ne’e rekoñese iha preokupasaun barak husi komunidade kona-ba ezekusaun fundu, tanba ne’e konsellu hanoin katak presiza atu partilla informasaun sira ne’e hodi promove transpárensia nune’e hotu-hotu bele akompaña gastu ba fundu ne’e ba ne’ebé no ba saida de’it.

Nune’e mós, Koordenadór Sekretariadu Konsellu Jestaun Fundo COVID-19, Januario da Gama, realsa iha sistema sei dezenvolve meiu ida hanesan mós iha portál transparénsia atu ema hotu bele akompaña ba ezekusaun Fundu COVID-19.

“Kona ba atu publika rezultadu ezekusaun ba fundu ne’e, depois ami sei haree atu hotu-hotu bele akompaña iha parte ezekusaun no mós sekretariadu sei kontinua atualiza nafatin ninia progresu husi ezekusaun rasik, to’o iha ne’ebé ona no kapasidade Estadu liuhosi Governu ezekuta fundu ne’e rasik husi programa no atividade sira ne’ebé aprova tiha ona husi konsellu jestaun”, nia adianta.

Antes ne’e, iha loron 2 abríl 2020, Parlamentu aprova orsamentu millaun $250 no iha loron tuir mai, sesta (03/04), haruka ba PR Lú Olo.

Iha loron 6 abríl, Prezidente Repúblika promulga ona Dekretu Parlamentu Nasionál númeru 14/V, kona-ba autorizasaun ba realizasaun transferénsia estraordinária husi Fundu Petrolíferu ho montante millaun $ 250.

Husi totál orsamentu millaun $250 ne’ebé aprovadu iha Parlamentu Nasionál, millaun $150 aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba Konta Jerál Tezouru no hosi millaun $150 ne’e, aloka $500.000 ba Parlamentu Nasionál atu dezenvolve polítika no programa iha ámbitu prevensaun no kombate surtu COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here