Imajen/Osória Marques.

DILI, 25 abril 2020 (TATOLI)–Governu liuhosi Ekipa Konjunta COVID-19, ohin, re-integra abitante hamutuk na’in-20 ba sira-nia família hafoin kumpre kuarentena obrigatóriu loron-14.

Diretór Unidade Apoiu Júridiku Ministériu Saúde, Belarmino da Silva Perreira informa, abitante na’in 20 ne’e kompostu hosi abitante sira iha Hotel Luxury hamutuk na’in-11 (feto lima no mane neen) no Hotel Luz Clarita na’in-9 (mane Hotu) ne’ebé ohin re-intregra ba sira-nia família no komunidade iha ida-idak nia uma ka hela fatin.

“Hosi abitante na’in-11 iha kuarentena obrigatóriu Hotel Luxury ne’e, abitante hosi Munisípiu Dili na’in haat (4) feto hotu, Bobonaro na’in rua, Ermera na’in rua, Lospalos na’in rua no Manatuto na’in ida. Abitante na’in-9 hosi Hotel Luz Clarita ne’e abitante hosi Ainaro na’in rua (2), Dili na’in rua (2) no Lospalos na’in lima (5),” dehan Belarmino da Silva Perreira ba jornalista sira iha Hotel Luxury, Hudi-Laran, Dili, sábadu ne’e.

Nia hatutan, abitante hirak ne’e konsege finaliza ona prosesu iha kuarentena obrigatóriu ne’ebé la hetan sintoma COVID-19 to’o ohin loron, tanba ne’e Governu deside re-integra hikas ba sira-nia família no komunidade.

“Prosesu kuarentena hotu ona maibé prosesu la’o, pesti Coronavirus ninian seidauk hotu. No, ita ne’ebé tama tan ba tempu mediu ramata ona tanba ne’e prosesu kuarentena obrigatóriu hotu ona maibé prosesu pesti iha komunidade seidauk ramata. Ita rona iha semana kotuk liubá, COVID-19) la’o iha komunidade Liquiça,” nia dehan.

Nia husu ba abitante hirak ne’e atu mantein regra Saùde ninian no distánsia sosiál iha sosiedade, fase liman beibeik ho sabaun bainhira antes no hafoin halo atividade ruma, no bele transforma informasaun COVID-19 ba komunidade sira.

“Husu ba abitante ne’ebé re-intregra ona ba família atu transforma informasaun kona-ba surtu COVID-19 durante imi aprende iha kuarentena hodi sira mós bele halo tuir. Tanba durante ne’e, komunidade barak mak sei duvida ho pesti Coronavirus ne’e,” nia hateten.

Entretantu, Diretór Nasionàl Munisipál hosi Ministériu  Administrasaun Estatal (MAE), Valente de F. Miranda, hato’o mensajen ba abitante sira atu kumpre nafatin regra ne’ebé Ministériu Saùde fó no hato’o agradese pesoál sira ne’ebé serbisu no hamatan ba abitante sira ne’e iha fatin kuarentena.

“Ami agradese nafatin ba parte hotu liuliu Pesoál Saùde no seguransa ne’ebé durante ne’e fó kontribuisaun hodi asegura ita-nia kolega sira no to’o ohin loron sira bele fila ba sira-nia uma ho saudavél,” nia dehan.

Antes atu re-integra ba sira-nia komunidade, abitante hirak ne’e simu kedas sertifikadu hosi ekipa konjunta COVID-19 hodi hatudu katak abitante sira ne’e laiha sintoma COVID-19 durante kumpre loron 14 iha kuarentena obrigatóriu.

Notísia Relevante: Abitante Na’in 14 iha Kuarentena Re-Integra Tan ba Família

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here