Diretór Nasionál Empregu Esteriór SEPFOPE, Filomeno Soares. Imajen Tatoli/Natalino Costa

DILI, 24 abríl 2020 (TATOLI) – Diretór Nasionál Empregu Esteriór iha Sekretaria Estadu Formasaun Profisionál Empregu (SEFOPE), Filomeno Soares, informa SEFOPE simu ona informsaun husi parte Austrália katak iha traballadór na’in-rua maka komete irregularidade.

Nia dehan, irregularidade ne’ebé traballadór na’in-rua komete ho tipu diferente, ida hakarak atu sai husi Seasonal Worker Programme (SWP), hodi aplika filafali servisu individu iha fatin seluk no traballadór ida seluk sai husi nia empreza hodi la’o livre iha Austrália laran.

“Ita-nia Traballadór ida hakarak sai husi SWP hodi hetan protection visa, nune’e halo fali servisu individu iha Austrália maibé halo ida ne’e susar oituan iha ne’ebá. Tanba ne’e maka sei halai tun sa’e hela iha Austália no agora Polísia buka hela”, hateten Diretór ne’e ba Agência Tatoli via telefónika, sesta ne’e.

Enkuantu timor-oan seluk, halai sai husi servisu fatin, hodi la’o ba mai dei’t no la kumpre Estadu Emerjénsia liga ho COVID-19 ne’ebé maka agora daudaun implementa iha Austrália.

“Agora daudaun Polísia Austrália kaer ona nia no detein hela iha ne’ebá. Ita hatene ema nia nasaun iha regulamentu rigór”, nia akresenta.

Diretór ne’e haktuir, ba kestaun ne’e parte SEFOPE hetan ona informasaun.

“Ami hetan informasaun tanba ita-nia traballadór sira ne’e sempre hetan monitór husi Adidu traballu no ita nian ekipa SEFOPE ida iha Darwin no sira sempre atualiza informasaun mai”, nia realsa.

Maski nune’e, parte SEFOPE kontinua husu ba traballadór sira atu mantein respeita iha ema-nia rai no kumpre regra ne’ebé estabelese iha ema-nia rai.

“Koopera ho ema no tenke adapta ho ema ninia sistema servisu, nune’e iha komportamentu di’ak atu empreza bele tau fiar nafatin”, Dirijente ne’e salienta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here