Eis Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 24 abríl 2020 (TATOLI)—Prezidente Parlamentu Nasionál (PPN), Arão Noé de Jesus da Costa Amaral, husu deputadu sira hatama proposta hodi halo eliminasaun ba orsamentu ho montante $500,000 maibé atu halo eliminasaun  ne’e kompeténsia plenária nian.

Nia dehan, atu antesipa propagasaun surtu COVID-19 ne’e mak halo parlamentu tau orsamentu $500,000 ne’e hanesan rezerva maibé agora públiku kestiona dehan la presiza.

Prezidente Parlamentu Nasionál argumenta, orsamentu $500,000 ne’e lei nú. 2/2020, promulga ona hosi Prezidente Repúblika no públika iha Jornál Repúblika, entaun órgaun ne’ebé de’it bele halo ezekusaun ba orsamentu ne’e.

“Agora hakarak altera fali bele halo projetu de lei, ne’e regra normál. Agora nakloke, deputadu sira bele hatama projetu lei aprezenta depois ba debate iha plenária. Se plenária aprova ita bele hasai tiha osan ne’e,” dehan Arão Noé ba jornalista sira hodi responde ba preokupasaun deputadu balu katak proposa antes ne’e la liuhosi Konsellu Administrasaun, iha Parlamentu Nasionál, sesta ne’e.

Arão Noé afirma, montante orsamentu ne’e atu fó de’it ba órgaun seluk, ne’e la’ós tuir dalan legál.

“Prosesu ne’e tuir lei, altera fali mós tenke ho lei tanba ne’e kabe ba deputadu sira hola inisiativa proposta lei hodi halo alterasaun depoius prezidente simu no ajenda, lori ba plenária mak sei deside. Se plenária aprova dehan ne’e elimina tiha, entaun hasai tiha orsamentu ne’e,” nia dehan.

Nia esplika, rejimentu parlamentu no lei nú 12/2017, de 24 de maiu kona-ba Lei Organizasaun no Funsionamentu Administrasaun Parlamentár (LOFAP) laiha artigu ida dehan katak deputadu labele aprezenta proposta aumenta ka diminui osan maibé deputadu bele halo proposta saida de’it, agora aprova ka lae ne’e kompeténsia plenária nian.

Notísia Relavante: PLP Konsidera Preokupasaun Públiku Kona-ba Orsamentu $500.000 Pertinente

Jornalista : Evaristo Soares Martins

Editór      : Cancio Ximenes

2 KOMENTÁRIU

  1. Publiku “merese” ou iha dever preukupa ho orasamentu $500.000 nb foti husi orsamentu ba surtu covid-19. OJE nb iha posibilidade atu aloka ba program parlamentar maibe imi mak sumba tea. Oinsa logika ne lao. E favor klarifika ho tranparansia knb osan $500.000 ba programa parlamentar?

HAKEREK NO HATÁN

Please enter your comment!
Please enter your name here