Dezeñu inestimentu Ótel ne'ebé Pelican Paradise atu konstrui iha area Tasi-Tolu. Imajen/espesiál

DILI, 24 abríl 2020 (TATOLI) – Maski Estadu deklara ona Estadu Emerjénsia hahú loron 28 marsu to’o 26 abríl hodi evita propagasaun surtu COVID-19 iha rai-laran, maibé Kompañia Pelican Paradise deside kontinua ho obra investimentu faze dahuluk hodi konstrui otél, apartamentu no rezidénsia hamutuk unidade 287 iha área entre Tasi-Tolu no Tibar.

Diretór Ezekutivu Pelican Paradise, Jeremiah Chan, hateten maski iha períodu Estadu Emerjénsia, konstrusaun obra boot ho kustu millaun $100 ne’e tenke kontinua la’o.

“Ami-nia servisu sei la’o nafatin, maibé neneik oituan tanba ami labele fó tempu liu ba ema atu servisu tanba ami tuir medida Estadu Emerjénsia, ami mós tenke halo protesaun ba traballadór sira  tuir medida Estadu Emerjénsia no karik servisu mós tenke uza protesaun. Tanba ne’e ami la hapara konstrusaun ho porsentu 100, maibé la’o ho neneik no oituan de’it”, tenik Diretór Jeremiah ba Agência Tatoli via telefónika, sesta ne’e.

Notísia Relevante: Governu Apoiu Projetu Pelican Paradise Faze Dahuluk

Nia dehan daudaun ne’e traballadór esensiál de’it mak sei servisu tanba seidauk hala’o rekrutamentu ba trabaladór sira.

“Ami la suspende ami-nia servisu, maibé ami husu ba traballadór esensiál mak ba servisu hodi uza mákina pezadu de’it”, Dirijente afirma.

Kompañia Pelican Paradise, halo tuir medida saúde mundiál no Estadu Timor-Leste hodi fó protesaun ba traballadór fase liman no han hahán ne’ebé nutritivu.

“Ami husu trabaladór Timor-oan na’in-neen kompostu husi na’in-tolu kaer mákina pezadu no na’in-tolu hanesan seguransa atu hela kedan iha fatin servisu atu labele iha risku vida no hadook-an husi propagasaun COVID-19”, nia salienta.

Jeremiah Chan adianta, Pelican Paradise ninia intesaun mak iha COVID-19 ka laiha sei kontinua halo investimentu no laiha mundansa no mós promote ba Governu no povu atu kontinua hala’o investimentu ne’e to’o hotu.

“Ami mós hakarak fó konfiasa ba Governu no povu, katak ami kontinua investimentu ne’e maibé ho neneik oituan, kuandu Coronavírus  ne’e termina ami sei halais obra investimentu ne’e liuhosi rekrutamentu traballadór timor-oan”, Jeremiah promote.

Iha loron 28 fevereiru Pelican Paradise, lansa ofisiál investimentu ba konstrusaun apartementu, otél no rezidénsia hamutuk unidade 287 ho nível otél fitun-lima, ho kustu orsamentu millaun $100 iha área Tasi-Tolu.

Investimentu dahuluk ne’e empreza presiza traballadór timoroan na’in- 300 no projetu faze dahuluk ne’e ho estimasaun sei finaliza durante tinan tolu nia-laran.

Projetu ne’e resposabiliza husi Pelican Paradise, ne’ebé sei halo obra iha rai ektare 16.

Antes ne’e, Ministru Estadu Prezidénsia Konsellu Ministru, Hermenegildo Augusto Cabral Pereira, hateten ezekutivu sira rona aprezentasaun kona- ba projetu Pelican Paradise, hanesan projetu boot ida-ne’ebé dezenvolve kle’ur ona to’o ohin loron, nune’e bele entende didi’ak to’o ona pontu ne’ebé no atu hahú oinsá.

Tuir governante ne’e, Primeiru-Ministru ho membru governu seluk hakarak serbisu maka’as ba viabilizasaun, nune’e bele tulun hamosu duni projetu ne’e hanesan realidade ba rai Timór. Tuir planu, Pelican Paradise sei halo dezenvolvimentu turístiku ho investimentu hamutuk ho montante miliaun $700.

Área dezenvolvimentu turístiku ne’e tuir planu sei harii iha rai ektare 558, iha zona entre Tasi-Tolu no Tibar, ne’ebé sei inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.

Dezenvolvimentu ne’e sei permite kriasaun kampu traballu ba ema hamutuk 1.500 iha faze konstrusaun no 1.300 kampu traballu permanente hafoin konstrusaun no reflorestasaun projetu atinje ona porsentu 80.

PProposta investimentu kompañia internasionál husi Malázia ne’e, hahú kedas iha tinan-2008, iha V Governu Konstitusionál ninia tempu, ne’ebé antes ne’e lidera husi Primeiru-Ministru, Kay Rala Xanana Gusmão.

Nune’e, Governu hasai rezolusaun númeru 33/2015, 5 outubru no aprova hodi hahú konstrusaun.

Kontratu Pelican Paradise ho Governu iha inisiál ba tinan 50 no posibilidade sei renova ba tinan 50. Nune’e mós, Pelican Paradise sei sai mother company ba kompañia hamutuk 20 husi nasaun Singapura no Malázia, ne’ebé sei hamutuk halo projetu boot ne’e.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here