Osan Dolar Amerikanu. Imajen/Google

DILI, 24 abríl 2020 (TATOLI)-Diretór Eskola Katólika Santa Tereziña Meninu Jesus (STMJ), Pe. Alberth F. Morato informa nia parte hasai ona desizaun hodi aplika propinas gratuita ba estudante pre- eskolár to’o ensinu sekundáriu durante implementasaun estadu emerjénsia relasaun ho surtu COVID-19 iha Timor-Leste.

Totál estudante husi nivél pre-eskolár to’o sekundáriu hamutuk ema na’in 1270, pre-eskolár na’in 70, ensinu báziku 600-resin no sekundáriu 600-resin.

Antes ne’e kada fulan estudante pre-eskolár selu propinas $ 30.00, ensinu báziku $ 8.00 no Sekundáriu $ 10.00

“Ha’u hanesan sidadaun iha nasaun ne’e, iha mós responsalblidade ba ema lubuk ida ninia vida, iha mós obrigasaun atu kumpre regulamentu ne’ebé fo sai ona, tanba ne’e ha’u deside fó toleránsia ba estudante sira durante estadu emerjénsia la selu osan eskola,” deklara, Padre Paróku Bedois ne’e, ba TATOLI iha ninia rezidénsia Bedois, sesta ohin.

Maibé tuir nia prosesu selu propinas ne’e sei re-ativa fila fali hafoin prosesu aprendijazen ba estudante sira lao normal hikas hanesan baibain.

“Regras husu mai ita tenki kumpre distánsia sosiál no distánsia fizíku hodi hapara movimentu. Agora Inan-Aman sira halo negósiu de’it mós tenki para, se ita obriga sira tenki selu osan iha ne’ebé,” tenik tan.

Entretantu, Ministra Edukasaun Juventude no Desportu (MEJD), Dulce de Jesus Soares, informa Governu seidauk halo diskusaun kona-ba asuntu ne’e,maibé nia fiar katak dirijente eskola privada sira sei la foti desizaun ne’ebé fó todan ba estudante sira.

“Ha’u seidauk hanoin to’o iha ne’ebá, maibé ha’u esforsu nafatin atu buka meiu hodi ko’alia ho dirijente sira husi eskola privada sira atu haree asuntu ida ne’e,” katak Governante.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here