Portavóz Gabinete Sentru Integradu Jestaun Krize (CIGC), Sergio Lobo. Imajen/Egas Cristovao

DILI, 24 abríl 2020 (TATOLI)-Portavóz Sala Situasaun Sentru Integradu Jestaun Krize (CIGC-sigla portugés) Sergio Lobo, informa Enfermeiru Na’in ida daudaun ne’e izola ona iha fatin izolamentu Sentru Saúde Vera Cruz Dili tanba afetadu ona ba surtu COVID-19 pozitivu.

Profisionál Saúde ne’e hetan transmisaun coronavirus tanba durante ne’e fó atendementu ba pasiente COVID-19 iha fatin izolamentu Vera Cruz ho Ospitál Nasionál Guido Valadares Dili.

“Ita nia ekipa sira foti ona nia no agora iha ona izolamentu Vera Cruz ninia kondisaun di’ak hela, laiha sintoma, maibé agora tenki hela iha izolamentu hodi hetan akompañamentu husi maluk pesoál saúde sira seluk ,” katak Sergio Lobo, durante iha konferénsia imprensa ne’ebé hala’o iha CCD, sesta ohin.

Atu prevene transmisaun surtu ne’e atu da’et ba ninia família ho ema seluk ne’ebé nia halo kontaktu direta antes ne’e, ekipa vijilánsia epidemiolójika foti ona sampel hodi halo teste.

Tanba nia konfirmadu entaun sese de’it mak durante ne’e halo kontaktu ho nia inklui ninia família sira tenki mós hetan hotu teste,” reforsa liután.

Entretantu, tuir dadus CIGC fó sai iha kinta (23/04/2020), kazu konfirmadu 23, provável na’in haat, hein rezultadu 28, suspeitu 382 no negativu 327, rekupera na’in ida.

No dadus sesta ohin, kazu konfirmadu 24, kazu foun na’in ida, hein rezultadu 21, suspeitu 392, negativu 347, rekupera na’in rua no provável laiha.

Jornalista : Tomé Amado.

Editór       : Agapito dos Santos

HAKEREK NO HATÁN

Please enter your comment!
Please enter your name here