SERVE,IP. Imajen/Espesiál

DILI, 24 abríl 2020 (TATOLI) – Haree ba daudaun Timor-Leste sei iha períodu Estadu Emerjénsia (EE), maka Servisu Rejistu no Verifikasaun Emprezariál, Institutu Públiku (SERVE, IP) fó sai anúnsiu públiku katak dokumentu ne’ebé kaduka sei nafatin válidu.

“Dokumentu rejistu komersiál sira inklui Sertidaun Rejistu Komersiál, Sertifikadu no Autorizasaun hodi hala’o Atividade Ekonómika, ne’ebé maka kaduka ka liu tiha ona prazu validade ninian, sei kontinua válidu durante Estadu Emerjénsia”, refere nota ofisiál ne’ebé Agência Tatoli asesu, sesta ne’e.

Ba Sertidaun no Sertifikadu hirak ne’e sei bele halo renovasaun bainhira EE ne’e ramata ka fila fali ba normalidade.

SERVE mós sei loke rejistu foun, ne’ebé bele haruka dokumentu ka pedidu aplikasaun ba rejistu nian liuhosi email hanesan tuir mai:

  1. Ana Jeánnie de Corte-Real: ajamdecortereal@mof.gov.tl
  2. Noemia Amaral: namaral@mof.gov.tl
  3. Elvis Hau: ealhau@mof.gov.tl
  4. Carlos Pinto: copinto@mof.gov.tl

Nune’e mós, bele vizita website SERVE: www.serve.gov.tl hodi bele hetan ka baixa “Formuláriu ba Pedidu ba Rejistu Komersiál Provizóriu iha Períodu Estadu Emerjénsia ka Situasaun Emerjénsia nian” no priense de’it mak formuláriu ne’e no haruka ba email sira ne’ebé iha ona.

“SERVE sei prosesa no emite ba ita bo’ot sira dokumentu Sertifikadu Rekoñesimentu ba Rejistu Komersiál Provizóriu iha Períodu Estadu ka Situasaun Emerjénsia nian no sei haruka fali ba ita bo’ot sira liuhosi email”, haktuir nota ne’e.

Nune’e, bainhira simu ona dokumentu “Sertifikadu Rekoñesimentu ba Rejistu Komersiál Provizóriu iha Períodu Estadu ka Situasaun Emerjénsia nian”, ne’ebé maka pertense ba negósiu no empreza maka benefisiáriu iha ona legalidade ofisiál hodi hala’o negósiu no atividade ekonómika iha períodu EE.

“Sertifikadu referente sei kontinua válidu bainhira Estadu Emerjénsia ne’e sei permanese no bainhira situasaun filafali ba normalidade ona, nune’e ita bo’ot sira horu iha devér ka kompulsóriu atu mai atualiza fali ita bo’ot sira nia dokumentu sira ne”, esplika nota ne’e.

Nune’e mós iha númeru kontaktu ba klarifikasaun no konfirmasaun ruma hanesan tuir mai: 77253501, 77253508, 77505345, 78244565, 77114262, 78691253, 78101659.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here