Portavóz Gabinete Sentru Integradu Jestaun Krize (CIGC), Sergio Lobo. Imajen/Egas Cristovao

DILI, 24 abríl 2020 (TATOLI)-Portavóz Sala Situasaun Sentru Integradu Jestaun Krize (CIGC-sigla portugés) Sergio Lobo hateten kazu konfirmadu COVID-19 to’o sesta (24/04/2020) rejista tan kazu foun ida hodi aumenta ba ema 24, maibé na’in rua maka rekupera ona.

Tuir dadus kinta horiseik, kazu konfirmadu 23, provável na’in haat, hein rezultadu 28, suspeitu 382 no negativu 327, rekupera na’in ida.

Maibé dadus CIGC ba sesta ohin, kazu konfirmadu 24, kazu foun na’in ida, hein rezultadu 21, suspeitu 392, negativu 347, rekupera na’in rua no provável laiha.

Kazu COVID-19 pozitivu ne’e deteta hosi Profisionál Saúde ne’ebé maka durante ne’e halo hela atendementu ba pasiente coronavirus iha fatin izolamentu Sentru Saúde Vera Cruz no Ospitál Nasionál Guido Valadares Dili.

Profisionál Saúde ne’e izola ona iha Sentru Saúde Vera Cruz no iha kondisaun saúde ida di’ak.

“Sira provável na’in haat (4) horiseik nian negativu ne’e iha ona planu atu muda sai sira husi Vera Cruz ba fali kuarentena,” dehan Doutór Sergio Lobo, durante konferénsia imprensa iha Sentru Konvensaun Merkadu Lama Dili, sesta ohin.

Sidadaun ne’ebé sei hela iha kuarentena obrigatóriu iha Dili no Munisípiu hamutuk 367, auto-kuarentena 48, no sai ona husi kuarentena hamutuk 1695.

Eis Ministru-Saúde ne’e reprezenta Governu hodi kontinua apela ba sidadaun hotu-hotu atu fó nafatin konfiansa ba Governu hodi atende kazu COVID-19 iha rai-laran.

Alende ne’e husu atu mantein distánsia, evita movimentu iha fatin públiku, bandu tuur hamutuk ho ema liu na’in lima no seluk tan.

“Fase liman bebeik, tuur hakmatek iha uma, kontinua uza maskra, labele ka’er oin, ibun inus no matan wainhira seidauk fase liman,” nia reforsa liután.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here