Primeiru-Ministru, Taur Matan Ruak. Imajen Tatoli/Egas Cristovão

DILI, 23 abril 2020 (TATOLI)–Primeiru Ministru (PM), Taur Matan Ruak hateten, Prezidente Repúblika, Francisco Guterres “Lú Olo”, nafatin fó apoiu no husu Governu halo esforsu atu bele haree no foti medida, hodi hadi’a situasaun iha rai laran liuliu minimiza impaktu hosi Coronavirus (COVID-19). 

“Prezidente Repúblika kontinua nafatin fó apoiu no husu Governu halo esforsu atu bele haree no foti medida, hodi hadi’a situasaun iha rai laran liuliu minimiza impaktu hosi Coronavirus (COVID-19),” dehan Primeiru Ministru (PM), Taur Matan Ruak, ba jornalista sira hafoin hala’o enkontru semanál ho Prezidente Repúblika (PR), Francisco Guterres Lu Olo, iha palásiu Prezidensiál, Bairru Pité, Dili, kinta ne’e.

Taur hateten, aproveita iha enkontru ne’e, nia informa ba xefe Estadu katak VIII Governu Konstitusionál kontinua halo esforsu atu bele termina hodi aprova medida ekonómiku no sosiais ne’ebé bele ajuda populasaun sira oinsá minimiza impaktu Coronavirus.

“Informa ba Prezidente Repúblika katak Governu halo esforsu atu haree oinsá mak bele termina hodi aprova medida ekonómiku no sosiais, ne’ebé bele ajuda ita-nia populasaun sira, hodi bele minimiza impaktu COVID-19 iha ita-nia rain,” PM Taur subliña.

Xefe Governu ne’e esplika, durante ne’e Governu halo hela esforsu no horisehik lorokraik halo diskusaun ikus liu kona-ba pakote tomak kona-ba medida ekonómiku ne’e.

“Kuandu aprova ona, entaun, naturalmente ministériu sira sei desimina informasaun ba populasaun tomak atu hatene intervensaun Governu nian ne’e iha área saida de’it. Governu tenke halo duni no haree ninia envergadura ne’e to’o iha ne’ebé, ne’e to’o iha momentu konkretu Governu sei informa. Maibé agora tenke halo duni hodi ajuda redús impaktu ba ita-nia ekonomia,”  Taur hateten tan.

Taur esplika, oras ne’e Governu haree buat rua dala ida mak haree ba povu nia moris tanba moras ida ne’e ataka ema juta rua resin iha mundu no ema lubuk ida mak mate ona.

“Ita seidauk mate maibé ita-nia númeru ne’e sa’e. Entaun, atensaun ita-nian ne’e, ita fó prioridade liu ba ita-nia moris. Tuir mai, ita fó prioridade ba ita-nia kabun no ita-nia ekonomia. Daudaun ne’e, apezar de Estadu Emerjénsia maibé Governu sei fleksibiliza, ita-nia populasaun sira sei bele la’o ba-mai, loja sira sei kontinua loke. Hanesan ita hare iha nasaun seluk, ita haree ema kuandu lockdown ne’e lockdown tebes duni. Tanba ne’e, ita tenta atu uza medida ida proporsionál ho progresiva. Ne’e hanesan ita sa’e eskada, sama ain ida, rua, tolu, haat,” Taur esplika detallada.

Tanba ne’e, Xefe Governu ne’e husu ba populasaun sira tenke kontinua tuir nafatin instrusaun sira husi Ministeriu Saúde Kona-ba ijiéne, distánsiamentu sosiál no seluk tan, tanba moras ida ne’e la’ós moras baibain.

“Ha’u espera katak, labele mai ita-nia rain. Mai karik mós labele grave liu, hanesan horibainhira ha’u dehan tiha ona iha Parlamentu,” nia informa tan.

Xefe Governu ne’e mós subliña nafatin katak, agora Governu foku-liu ba moras Coronavirus tanba pratikamente, ekonomia iha mundu tomak ne’e paradu.

Nia fó ezemplu katak, hanesan ema lakon empregu, dezempregu aumenta, kresimentu laiha, famíliaa sira terus, tanba ne’e Timor Sei la sees hosi ida-ne’e.

“Oinsá mak ita rekopera, ne’e ita sei hanoin ida ne’e. Agora daudaun ita haree liu ba impaktu imediatu maibé naturalmente ba tinan ida ka tinan rua, ita tenke iha planu, hanesan mós nasaun sira seluk. Se ita la halo ida ne’e, ita sei labele la’o ba oin,” Taur hateten.

Notísia Relavante: Xefe Estadu Alerta Governu Prepara-an ba Senáriu Aat Liu

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here