Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 23 Abríl 2020 (TATOLI) –Dadus nasionál ba propagasaun surtu Coronavirus ka COVID-19 ne’ebé fó sai ofisiálmente hosi Sentru Integradu Jestaun Krize  (CIGC, sigla portugés), kinta ohin (23/04/2020), hatudu katak, kazu konfirmadu kontinua mantein 23 (la iha mudansa), suspeitu na’in-382 (horiseik iha 370), hein rezultadu na’in-28 (horiseik iha 47), provavel na’in-haat (4), kazu ativu (active cases) ka kazu pozitivu na’in-22, negativu na’in-327 (horiseik 296) no rekupera ka kuradu mós mantein na’in-ida (1).

Notísia Relevante : COVID-19, TL Mantein Kazu Konfirmadu 23

Koordenadór Ofisiál Ligasaun Forsa Tarefa COVID-19, Rui Maria de Araújo, liuhosi konferénsia imprensa iha Sentru Mídia CIGC Sala Situasaun iha Sentru Konvensaun Dili (CCD), konfirma katak, abitante-sira ne’ebé daudaun ne’e iha hela konfinamentu obrigatóriu ka kuarentena na’in-432 ; na’in-337 iha  fasilidade Governu nian iha Dili no na’in-68 iha munisípiu iha fasilidade Governu nian.

“Hosi sira ne’ebé kuarentena iha ema na’in-21 maka profisionais saúde, ne’ebé durante ida ne’e hala’o sira-nia serbisu iha fatin kuarentena no fatin izolamentu-sira,” afirma Rui Araújo hodi informa tan, abitante hirak ne’ebé iha auto-kuarentena iha munisípiu na’in-27 no iha Dili zero (0).

Rui Maria de Araújo hatutan, abitante ne’ebé pasa ona  ka liu ona konfinamentu obrigatóriu durante loron-14 nia laran hamutuk na’in-1.643; iha Dili na’in-1.309 no iha munisípiu na’in-334.

“Kazu foun hosi horiseik mai loron ohin nian laiha (0),”  hateten eis Primeiru-Ministru no eis Ministru Saúde ne’e.

Liuhosi konferénsia imprensa ne’e, Rui Maria de Araújo, aproveita salienta mós pontu hirak hanesan tuir mai ne’e: Dahuluk,  Fó hanoin hikas ba públiku katak kazu konfirmadu no kazu provavel ne’ebé agora Timor-Leste iha, sei nafatin restritu ba grupu ka ‘’cluster’’ neen (6).  Ida ne’e hatudu katak bele iha ona transmisaun lokál, maibé seidauk iha evidénsia kona-ba transmisaun iha komunidade.

“Ita so bele dehan katak, iha ona transmisaun iha komunidade, bainhira mosu kazu konfirmadu ruma iha populasaun nia leet, ne’ebé la iha relasaun ho ema-sira halo viajen hosi fatin afetadu, no la iha mós relasaun ho ema ruma ne’ebé konfirmadu ona,” hateten Rui Araújo.

Daruak, hakarak informa mós públiku katak, kazu konfirmadu-sira iha Vera Cruz, ida-idak simu ona ninia rezultadu laboratóriu ida primeiru, no hosi loron balun liu bá, hahú halo fali ona ezame laboratoriál hodi monitoriza se virus sei iha ka la’e iha sira nia isin. Pur-enkuantu, hosi sira-na’in-27, seidauk iha ida ne’ebé negativu dala rua tuituir malu, ho rua (2) diferensa tempu liuhosi loron ida. Ekipa médika nafatin akompaña no sira hotu to’o oras ne’e daudaun la hatudu sintoma.

Datoluk, Servisu Saúde Munisípiu Liquiça kontinua hala’o atividade vijilánsia epidemiolojia ne’ebé téknikamente koñesidu nu’udar “sentinel surveillance’’ ka vijilánsia sentinela. Iha atividade ida ne’e,  Rui Araújo esplika, maski epidemilójikamente ema-ida, la tama iha definisaun kazu suspeitu COVID-19, maibé tanba aprezenta sintoma infesaun respiratória aguda, ema ne’e sujeitu ba rekolla espésime hodi halo análize iha laboratóriu.

“To’o ohin meiu-dia, sira hosi Liquiça foti ona espésime, hosi ema na’in-17. Razaun, hahú halo vijilánsia sentinela iha Sentru Saúde Liquiça, tanba kazu professor sira nian, ho objetivu atu hatene se iha ona transmisaun iha komunidade ka la’e,” esplika Rui Maria de Araújo.

Dahaat, CIGC informa mós ba públiku katak ekipa vijilánsia sanitária hosi departamentu saúde ambientál Ministériu Saúde nian, halo dezinfesaun regular ba fatin kuarentena-sira ne’ebé ekipa MTCI nian halo jestaun no serbisu hamutuk ho ekipa medika-sira hosi Ministériu Saúde, no halo mós dezinfesaun ba fatin izolamentu, tuir oráriu fixa ona.

Nia klarifika katak, fatin-sira ne’ebé halo dezinfesaun maka hanesan kuartu, odamatan, didin, armáriu, meza, kadeira, kama, hariis-fatin, sintina no arredores, varanda, fatin lixu no lixu-sira molok lori ba destroi.

Dalimak, CIGC hakarak esplika mós ba públiku katak prosesu dezinfesaun, iha sorin ida, hanesan deskontaminasaun hodi halakon ka oho mikro-organizmu, hanesan virus no baktéria iha sasán, ka objetu inanimadu, uza krizól 5%. Iha sorin seluk, atu oho mikro-organizmu iha ema nia isin, normálmente uza anti-séptiku hanesan álkool, betadine, ho seluk tan. Tanba ida ne’e, Organizasaun Mundiál Saúde (OMS) la autoriza halo dezinfesaun ba ema, tanba ninia impaktu ba ema ne’e nia saúde, liu-liu hamosu irritasaun iha kulit, matan, ibun no mós vias respiratória. Oras ne’e daudaun, fokus hosi prosesu dezinfesaun ne’ebé Ministériu Saúde halo maka, fatin izolamentu, fatin kuarentena no transporte ne’ebé sirkula iha izolamentu no kuarentena-sira.

Daneen, públiku presiza mós hatene katak, medida ne’ebé Ministériu Saúde foti hodi extende kuarentena iha fatin balun, mosu tanba iha fatin hirak ne’e, deteta kazu pozitivu ka provavel ruma. Ema ne’ebé hela iha fatin hanesan, ho ida ne’ebé konfirmadu ka provavel, presiza nafatin iha kuarentena durante loron 14 tan, sura hosi loron ne’ebé deteta kazu konfirmadu ka provavel, hodi evita, karik sira balun hetan ona kontájiu, lori sai ba kontajia fali komunidade.

Aproveita iha ne’e,  CIGC agradese pasiénsia maluk-sira hotu iha kuarentena ho ida-idak ninia família, no mós louva no agradese pasiénsia, abnegasaun no dedikasaun tomak, hosi sira hotu ne’ebé iha liña frente iha kuarentena-sira, hahú hosi sira ne’ebé jere fatin kuarentena hosi MTCI, ekipa medika hosi Ministériu Saúde no mós membru seguransa sivíl no Polísia Nasionál Timor-Leste (PNTL) ne’ebé envolvidu iha seguransa fatin kuarentena-sira.

Dahituk, informa mós ba públiku katak kazu suspeitu-sira iha Hatulia, Aileu ho Same, hotu-hotu hatudu rezultadu negativu.

CIGC nafatin apela ba populasaun tomak atu bainhira iha sintoma infesaun respiratória aguda hanesan, isin-manas, kakorok-moras, mear, inus-ben, ruin ki’ik-boot sin hotu, halo favor ba konsulta iha sentru saúde ka ospitál-sira.

Kolabora no partisipa ho disiplina iha distansiamentu sosiál, distansiamentu fíziku, no hijiene pesoál.

“Keta haluha, tuur hakmatek iha uma; lalika sai arbiru, ka halibur malu beibeik; fase liman beibeik ho sabaun; labele kose liman ba matan, inus ho ibun, uza máskara bainhira sai hosi uma,” Rui Araújo afirma-tan.

Maluk sira ne’ebé kompleta ona konfinamentu obrigatóriu ka kuarentena, Rui Araújo husu atu bainhira sente iha sintoma karik, favor kontakta númeru 119.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here