Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 23 abríl 2020 (TATOLI)–Portavóz Sentru Integradu Jestaun Krize (CIGC-sigla portugés), Rui Maria de Araújo informa, Servisu Saùde Munisípiu Liquiçá kontinua halo atividade vijilánsia epidemiolojia ne’ebé teknikamente koñesidu sentinel surveillance ka vijilánsia sentinel hodi foti spésime ba ema na’in-17.

Nia hatutan, iha atividade ida-ne’e maski epidemilójikamente ema-ida la tama definisaun kazu suspeitu COVID-19 maibé tanba aprezenta sintoma infesaun respiratória aguda, ema ne’e sujeitu ba rekolla espésime hodi halo análize iha laboratóriu.

“To’o ohin meudia (23/04/2020) sira husi Munisípiu Liquiçá foti ona espesiemen ba ema na’in-17. Razaun, hahú halo vijilánsia sentinela iha Sentru Saúde Liquiçá, tanba kazu profesór sira-nian ne’ebé akontese iha Liquiçá ho objetivu atu hatene, se iha ona transmisaun iha komunidade ka lae,” dehan portavóz Rui Maria de Araújo liuhosi koneferénsia imprensa iha Sentru Mídia CIGC Sala Situasaun iha Sentru Konvensaun Dili (CCD), Merkadu Lama, kinta ne’e.

Hatán kona-ba preokupasaun komunidade ka estudante sira atu halo teste masal tanba profesór sira hanorin iha Liquiçá, eis Ministru Saúde hateten, karik iha komunidade balun sente isin-manas, me’ar, kakorok moras no inus-been, favór hakbesik ba Sentru Saúde.

“Sentru Integradu Jestaun Krize husu ba polulasaun Liquiçá katak se ita-boot sira sente sintoma infesaun respiratória aguda hanesan isin-manas, me’ar, kakorok moras no inus-been, halo favor ba iha Sentru Saùde Liquiçá atu sira hasai espésime hodi halo análize,” nia sujere.

Notísia Relavante: Update COVID-19, Kazu Konfirmadu Mantein 23 no Suspeitu 382

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here