Sekretáriu Estadu Komunikasaun Sosiál, Merício Juvinal dos Reis ‘Akara’, Konvoka reuniaun ho mídia-na’in sira iha sala reuniaun SEKOMS, Palásiu Governu, kuarta ne’e. Imajen Tatoli/Egas Cristovão

DILI, 23 abríl 2020 (TATOLI) – Governu liuhosi Sekretáriu Estadu Komunikasaun Sosiál, Merício Juvinal dos Reis ‘Akara’, konvoka reuniaun ho mídia-na’in sira hodi atualiza estímulu ekonómiku  ne’ebé Governu aprova ona, liuliu ba apoia direita ne’ebé maka Governu sei oferese ba mídia-na’in sira.

“Ami konvida mídia-na’in enkotru atu nune’e ami atualiza pakote ekonómiku ne’ebé maka Governu aprova ona atu implementa, tanba pakote ekonómiku ka istímulu ekonómiku ne’ebé Governu aprova ne’e, atu apoiu ba setór privadu. Ho nune’e ezisténsia mídia sira mós iha kategoria  setór privadu tanba ema barak maka sevisu liuliu ba jornalista sira barak halo servisu iha mídia privadu”, dehan Sekretáriu Estadu Akara hafoin ramata reuniaun iha Palásiu Governu, kinta ne’e.

Pakote ekonómiku iha verba ne’ebé fó apoia direita ba mídia-na’in sira, inklui mós setór privadu sira seluk atu asegura saláriu ba traballadór sira.

“Governu sei fó subsídiu porsentu 60 ba saláriu mídia-nain inklui setór privadu maka sei asegura ita bo’ot (jornalista) sira nian saláriu, restu depois empreza sira maka haree ho objetivu maka ita bo’ot sira kontinua halo servisu”, nia akresenta.

Notísia Relevante: SEKOMS Iha Ona Proposta ba Mídia Sira Halo Kampaña Prevensaun COVID-19

Apoia direta porsentu 60 ba fulan-tolu nian maibé fazeadamente sei haree no fundu ne’e rasik mai husi Fundu COVID-19 nian.

“Ita nian polítika apoiu direta ne’e ba fulan-tolu maibé fazeadamente ita sei haree depende ba orsamentu ne’ebé maka ita iha fontes ne’e sei maihusi Fundu COVID-19 no mós osamentu duodésimu ita sei haree ida ne’e“, nia salienta.

Tuir governante ne’e, bainhira fonte orsamentu ne’ebé maka Fundu COVID-19 no orsamentu duodésimu la to’o, ita tenke avansa fali ba Parlamentu Nasionál atu haree tanba objetivu ne’e la’ós atu haree fali ba buat seluk atu apoia duni ita-nian sidadaun hotu ne’ebé maka hetan problema tanba COVID-19 la’os tanba ida-idak ninia hakarak, tanba COVID-19  ne’e akontese ba nasaun hotu no nasaun hotu ko’alia polítika ida-ne’e.

“Estímulu ekonómiku ne’e nasaun sira hotu implementa, nune’e ekonomia labele mate no sidadaun sira labele sofre demais”, Akara salienta.

Governu sei husu ba parte banku sentrál atu re-negosia kréditu sira maka antes ne’e parte setór privadu halo inklui mídia privadu sira halo karik bele banku fó prolongamentu maizumenus fulan-tolu nia laran atu selu fali ba banku no banku labele ba fó presaun tanba situasaun COVID-19 ne’e nu’udar dezastre ida ne’ebé daudaun mundu infrenta.

Aleinde ne’e governante ne’e hateten, Governu liuhosi Sekretaria Estadu Komunikasaun Sosiál (SEKOMS) prevee orsamentu iha Sentru Integradu Jestaun Krize (CIGC, sigla portugués) husi orsamentu COVID-29 pur volta $200.000 hodi mídia sira bele asesu ba kampaña prevensaun COVID-19 nian.

“Fundu ne’e atu halo kampaña kona-ba COVID-29 nian liuhusi halo publisidade, distribui informasaun kona-ba COVID-19 ba to’o iha ita nian áre rurál no fundus ne’e hodi kontribui ba kampaña kombate COVID-19 karik mídia sira presiza bele halo proposta ba Gabinete Jestaun Krize”, Akara subliña.

Sorin seluk, hanesan Na’in ba Timor Post, José Maria Ximenes, haktuir enkontru ohin mídia-na’in sira relata kona-ba preokupasaun mídia nia iha kobertura relasiona ho situasaun COVID-19 no Estadu Emerjénsia, liuliu difikuldade iha parte rekursu hotu.

“Tanba ne’e mídia ida-idak nian, entaun ami sei deskute internamente ba apoiu Governu nian ne’ebé sei apoia mídia balun ne’ebé servisu troka malu tanba staf balun labele servisu. Tanba ne’e ami sei haree”, hateten José Maria.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here