Sekretáriu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

DILI, 23 abríl 2020 (TATOLI) – Sekretáriu Estadu Komunikasaun Sosiál, Merício Juvinal dos Reis ‘Akara’, hateten nia parte husu ona ba mídia-na’in sira atu enkamiña naran jornalista sira ne’ebé konsidera nu’udar liña frente no durante ne’e halo kobertura ba asuntu COVID-19, atu nune’e bele hetan apoiu espesiál fundu husi Governu.

“Ita presiza apoiu jornalista sira ne’ebé maka iha liña frente, la’ós jornalista sira hotu maibé ita tau konsiderasaun ba sira ne’ebé maka hanesan halo kobertura direta ba COVID-19 hodi fó-sai informasaun ba públiku”, dehan Sekretariadu Estadu Akara hafoin ramata audénsia ho mídia-na’in sira iha Salaun Sekretaria Estadu Komunikasaun Sosiál (SEKOMS), Palásiu Governu, kinta ne’e.

Governante ne’e konsidera, jornalista hola parte servisu iha liña frente, entaun iha enkontru interministeriál konkorda katak sei haree  jornalista ne’ebé maka loron-loron halo kobertura iha Sentru Mídia COVID-19 nian no iha fronteira.

“Sira-ne’e enfrenta direta no depois sira tranzmite informasaun ba ita atu asesu. Tanba ne’e agora daudaun ita sei rejista aleinde Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), imigrasaun, médiku no jornlista mós konsidera nu’udar liña frente”, nia akresenta.

Akara hateten, nia parte dehan ona ba mídia-na’in sira atu hatama númeru sertu naran jornalista liña frente hodi foku kobertura ba COVID-19.

Kona-ba orsamentu montante hira maka atu fó apoiu ba jornalista liña frente, Sekretáriu Estadu ne’e afirma sei diskute di’akliu atu haree montante loloos.

“Kuantidade osan ne’e sei diskute polítikamente ho Ministra Finansa atu prevee hira ba liña frente ita sei haree didi’ak tanba iha mós iha PNTL, F-FDTL. Tanba ne’e maka ita sei haree didi’ak, maibé jornalista sira ne’ebé iha liña frente presiza apoia tanba sira ne’e enfrenta risku boot. Tanba ne’e ita presiza apoia espesiál”, nia dehan tan.

Sorin seluk, Na’in ba Timor Post, José Maria Ximenes, hateten sira-nia parte sei haruka naran ba SEKOMS hafoin diskute internalmente no deside.

“Ami ohin dehan sei haruka naran sira ne’e mai SEKOMS, maibé ami sei iha diskusaun ida tanba ita sei deside ba jornalista sira ne’ebé maka kobertura iha Sentru Konvensaun Dili (CCD, sigla Portugés) ka sira ne’ebé ba kobertura no halo edisaun ne’e liña frente hotu ka oinsá”, hateten José

Nia dehan, presiza haree bainhira jornalista sira ba kobertura asuntu COVID-19 maibé la ho editór sira mós bele tama kategoria ka lae.

“Tanba ne’e maka ami sei diskute kona-ba ida-ne’e atu define loloos liña frente ne’e rasik tanba ne’e espesiál. Ami tenke diskute di’ak antes lori naran sira-ne’e hatama tanba ne’e la’ós espesiál de’it ba jornalista sira de’it maibé editór sira no mós sira seluk presiza haree hodi diskute mós”, nia realsa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here