Hare iha Atabae. Imajen Tatoli/António Gonçalves

DILI, 23 abríl 2020 (TATOLI) – Ministru Agrikultura no Peska, Joaquim José Gusmão dos Reis Martins, hateten maski proposta ne’ebé submete ba Sentru Integradu Jestaun Krize (CIGC, sigla Portugés) atu asesu ba Fundu COVID-19 ho montante $4,8-resin sei iha diskusaun, maibé nia parte hahú orienta ekipa tékniku hodi mobiliza ekipamentu halo produsaun ba hare iha époka daruak nian hodi garante ai-han iha períodu Estadu Emerjénsia no luta kontra COVID-19.

“Ami-nia proposta iha hela diskusaun ba aprovasaun, maibé ha’u orienta ona tékniku sira iha kampu atu hahú mobiliza ona ekipamentu hodi hala’o produsaun agríkola iha epoka daruak nian iha fulan-maiu iha Kosta Súl”, tenik Ministru Joaquim ba Agência Tatoli iha edifísiu Ministériu Finansa, Aitarak-Laran, kuarta ne’e.

Notísia Relevante: MAP Propoin Millaun $4,8 Hodi Asegura Ai-han iha Rai-laran

Ministru Joaquim dehan proposta ne’ebé submete ona ba CIGC ne’e hamutuk millaun $4.8-resin hodi foku ba produsaun hare, batar no ortikultura.

“Iha epoka daruak iha fulan maiu ne’e ita halai liu ba natar hodi hasa’e produsaun hare, batar no ortikultura, ne’ebé ita orienta ona atu hahú manutesaun tratór sira hodi normaliza fali ita-nia kanál irigasaun tanba iha sedimentasaun ass tebes”, nia akresenta.

Governante ne’e adianta, setór agrikultura daudaun ne’e perioridade liu tanba iha situasaun ida Estadu Emerjénsia hodi luta kontra COVID-19, tanba ne’e presiza hala’o produsaun ba produtu lokál atu asegura seguransa ai-han iha rai-laran.

Ho nune’e, Ministru ne’e dehan orientasaun ne’ebé fó ba tékniku sira ne’e atu hahú mobiliza, hodi hein aprovasaun proposta ne’e tanba hakarak halo mobilizasaun lalais fini, kombustível ba tratór sira, movimentu ba estensionista sira no adubu sira.

“Hakarak ka lakohi ita tenke tau osan atu dudu halo produsaun iha ita-nia rai rasik tanba nasaun importadór sira mos foku ba nia nasaun laran relasiona ho COVID-19”, nia salienta.

Antes ne’e, Kordenadór ba Ekipa Estudu no Análiza Risku iha Sentru Integradu ba Jestaun Krize (CIGC-sigla Portugés), Francisco Guterres, informa seguransa alimentár liuliu stock ai-han ne’ebé Governu Timor-Leste no setór Privadu sira iha atubele garante to’o iha fulan jullu tinan ne’e.

Nia akresenta hafoin ekipa halo estudu no análiza risku, observa no haree katak iha fulan-abríl to’o jullu ne’e stock foos ne’e disponível atu asegura ai-han iha territóriu laran.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here