Prezidente Forsa Tarefa ba Ekipa Konjunta Prevensaun COVID-19 RAEOA. Imajen/ResearchGate

DILI, 23 abríl 2020 (TATOLI) – Prezidente Autoridade Rejiaun Administrativa Espesiál Óe-Cusse Ambeno (RAEOA) no Zona Ekonomia Espesiál Sosiál Merkadu Timor-Leste (ZEESM-TL), José Luís Guterres ‘Lugu’, nomea ona antigu Ministru Saúde, Nelson Martins hodi sai Prezidente Forsa Tarefa ba Ekipa Konjunta Prevensaun COVID-19 (EKPC-19) iha RAEOA hodi garante prosesu tomak kona-ba servisu EKPC-19.

“Kompozisaun hodi reforsa ekipa forsa tarefa ba servisu prevensaun COVID-19 iha RAEOA, nu’udar kompromisu Prezidente Autoridade RAEOA ba esforsu tomak kona-ba responsabilidade autoridade ba luta hasoru propagasaun Coronavírus iha RAEOA”, relata Prezidente Autoridade Lugu, liuhosi nota ofisiál ne’ebé Agência Tatoli asesu, kinta ne’e.

Nota ne’e haktuir, nomeasaun ba antigu Ministru Saúde iha IV Governu Konstitusionál, Nelson Martins sai Prezidente Forsa Tarefa EKPC-19 RAEOA hodi bele viabiliza servisu hirak ne’e ho medida rápida, integrada no sinérjika entre Governu sentrál no autoridade Oé-Cusse.

Nune’e, Prezidente Autoridade RAEOA deside bazeia ba konsultasaun ho entidade relevante sira, inklui hato’o mós pedidu autorizasaun ba Primeiru-Ministru, Taur Matan Ruak, kabe ba kapasidade no kuñesementu antigu Ministru Saúde iha área serbisu saúde nian.

“Tanba interese nasionál, prezensa Doútor Nelson Martins importante tebes hodi kontinua asegura serbisu hirak ne’ebé la’o tiha ona, no sei kontribui mós hodi hadi’ak buat ne’ebé la’o lá dun di’ak durante ne’e ho konsisténsia”, dehan Prezidente Autoridade RAEOA ne’e.

Eis membru Govenu ne’e sei hetan mós asisténsia husi koordenadór ekipa COVID-19 sira ne’ebé oras ne’e eziste husi váriu instituisaun husi ekipa konjunta RAEOA nian.

Aleinde ne’e, Nelson Martins mós sei oferese ideia konstrutivu ba Prezidente Autoridade RAEOA hodi hamosu hanoin sira kona-ba kondisaun infraestrutura saúde nian, inklui ekipamentu hirak ne’ebé presiza ba futuru hodi dezenvolve setór saúde iha RAEOA.

“Prezensa Doutór Nelson Martins la’ós atu haree de’it ba situasaun atuál. Maibé prepara mós kondisaun kona-ba dezenvolvimentu setór saúde ne’ebé mak ita presiza atu halo iha futuru. Nune’e bainhira akontese moras da’et ruma, ita preparadu ona”, Lugu realsa.

Bazeia ba analiza husi servisu hotu ne’ebé mak durante ne’e hala’o hodi la hamosu konkordánsia hodi asegura servisu ho di’ak iha terrenu inklui aktu dezobedénsia sira ba rekomendasaun husi Organizasaun Mundial Saúde (OMS) no desizaun Governu Kona-ba tempu akollimentu loron 14, maka iha loron 21 abríl 2020 Prezidente Autoridade RAEOA hasai despasu hodi termina pozisaun Diretór interinu Serbisu Saúde Rejionál RAEOA, Marcos Seo.

“Iha tempu ida hanesan ne’e ita presiza aten barani hodi halo desizaun hadi’a buat ne’ebé laloos ba interese nasional”, Eis Ministru Negósiu Estranjeiru no Kooperasaun ne’e afirma.

Autoridade másima RAEOA ne’e hato’o mós agradese ba Diretór interinu sesante Serbisu Saúde Rejionál, Marcos Seo ne’ebé kontribui ona ba funsionamentu serbisu saúde iha RAEOA durante ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here