Sidadaun hamutuk 56 rona hela esplikasaun husi pesoál saúde molok re-integra ba komunidade, kinta (23/04). Imajen Tatoli/Egas Cristovão

DILI, 23 abríl 2020 (TATOLI) Governu liuhosi Ministériu Saúde (MS) re-integra ema 56 ba sira ninia família no komunidade hafoin kumpre loron 14 iha kuarentena obrigatóriu ne’ebé Governu prepara iha kapitál Dili.

Abitante na’in-56 ne’e maihusi fatin kuarentena iha Ótel rua hanesan Ótel Vila Verde na’in-15 kompostu husi mane na’in-hitu no feto na’in-ualu, no husi númeru ne’e munisípiu Dili na’in-ualu (mane tolu, feto lima), husi Baukau na’in-tolu (mane-ida, feto-rua), Lautein na’in-tolu mesak mane, no feto na’in-ida husi Bobonaru.

Iha Ótel Audian hamutuk ema na’in-41, husi númeru ne’e mane na’in-19, feto na’in-22.

Diretór Unidade Apoiu Júridiku MS, Belarmino da Silva Perreira, hateten abitante hirak ne’e Governu tenke re-integra ona ba sira nia família no komunidade tanba sira priense ona kritériu loron 14 iha kuarentena.

“Ohin ami re-integra sira iha fatin kuarentena rua bá iha sira ninia família no komunidade. Sira ne’e tama iha loron 8 abríl to’o iha 22 abríl kompletu ona loron 14 no kona-ba sira ninia kondisaun priense kritéria atubele sai husi fatin kuarentena hodi fila ba ida-idak ninia uma”, informa  Diretór Belarmino da Silva iha Ótel Vila-verde, kinta ne’e.

Entretantu hafoin realiza seremónia re-integra ba komunidade, ekipa MS prepara transporte hodi tula fila sidadaun hirak ne’e bá ida-idak ninia hela fatin, iha Dili laran no ba munisípiu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here