Xefe Departamentu Jestaun Merkadoria Guarda Munisípiu Dili, Berta Santa Gonçalves Vieira. Imajen/Egas Cristovão

DILI, 23 abril 2020 (TATOLI)–Governu liuhosi Departamentu Jestaun Merkadoria Guarda Munisípiu Dili hala’o serbisu hamutuk ho Ministériu Saùde no Organizasaun Mundiál Saùde halo ona sensibilizasaun ba kompradór no vendedór sira ne’ebé hala’o atividade faan no sosa iha merkadu sira iha Kapitál Dili.

Xefe Departamentu Jestaun Merkadoria Guarda Munisípiu Dili, Berta Santa hateten, durante iha implementasaun Estadu Emerjénsia ne’e ekipa Jestaun Merkadória hamutuk ho Organizasaun Mundiál Saùde halo sensibilizasaun kona-ba prevensaun COVID-19 ba kompradór no vendedór sira iha Merkadu Taibesi no Manleuana.

“Ami hamutuk ho Ministériu Saùde no Organizasaun Mundiál Saùde mós halo sensibilizasaun kona-ba prevensaun surtu COVID-19 ba negosiante sira atu kumpre distánsia sosiál no fase liman bainhira faan no sosa sasán iha Merkadu Taibesi no Manleuana,” dehan Berta Santa, ba ba Ajénsia TATOLI liuhosi telefone, kinta ne’e.

Nia dehan, daudaun ne’e vendedór no kompradór iha merkadu hirak ne’e aplika no kumpre duni regra distánsia sosiál no fase liman beibeik bainhira halo atividade faan no sosa.

“Ita haree kapaas loos bainhira tama merkadu Taibese no Manleuana ema hotu kumpri regra fase liman tanba Governu monta ona profil no kompletu sabaun fase liman nian iha merkadu hirak ne’e,” nia dehan.

Ekipa Jestaun Merkadória, nia hatutan, pronto serbí no ezekuta orden bainhira de’it hodi la haree ba Estadu Emerjénsia no subsidiu ba sira, maibé importante mak negosiante sira tenke kontribui no kumpre regra sira hosi Governu.

Nia haktuir, daudaun ne’e sira uza hela ekipamentu protesaun ba prevene surtu COVID-19 hanesan máskara no luvas hodi auguenta ba halo operasaun durante Estadu Emerjénsia ne’e.

Aleinde ne’e, Berta Santa husu ba negosiante abulante atu kumpre mós regra hanesan fase liman bainhira fó modo-tahan no simu osan hosi kompradór sira.

“Husu ba negosiante abulante atu kumpre regra Estadu Emerjénsia no obrigatoriamente tau bee iha masa litru lima (5) ho sabaun iha Karosa ka kareta laran, nune’e sira bele utiliza,”  nia sujere.

Tanba, nia dehan, atu kombate surtu COVID-19 ne’e presiza ema hotu nia konsiènsia no kontribuisaun ba Estadu Timor-Leste.

Entretantu, nia hatutan, durante implementasaun Estadu Emerjénsia ba surtu COVID-19, ekipa Jestaun Merkadoria Munisípiu Dili kontinua serbisu no mantein halo operasaun ba negosiante sira ne’ebé faan iha estrada no trotoar leten.

“Ami ekipa Jestaun Merkadória Munisípiu Dili nian laiha feriadu iha implementasaun Estadu  Emerjénsia ba surtu COVID-19. Ami mantein halo operasaun ba negosiante sira,” nia dehan.

Maski, tuir nia, surtu COVID-19 ne’e fasil da’et hosi ema ba ema no perigozu hodi hamate ema hanesan akontese iha rai liur maibé ekipa Jestaun Merkadória sira-nia serbisu la’o normál hanesan baibain.

Notísia Relavante: Negosiante Lamenta Atuasaun Ekipa Jestaun Merkadoria

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here