Ministru Koordenadór Asuntu Ekónomiku interinu no atuál Ministru Reforma Lejizlativa no Asuntu Parlamentár, Fidelis Manuel Leite Mangalhães. Imajen Tatoli/Egas Cristovão

DILI, 23 abríl 2020 (TATOLI)—Governu liuhosi Ministru Estadu Koordenadór Asuntu Ekonómiku (MEKAE) no Ministru Turizmu, Komérsiu no Indústria Ein-Ezersísiu, Fidélis Manuel Leite Magalhães, aprezenta polítika ekonómika ba Parlamentu Nasionál hodi antesipa propagasaun surtu COVID-19.

“Ne’e Polítika ekonómika hodi resposta COVID-19. Iha preokupasaun tolu ne’ebé mak ita tenta atu aborda. Dala uluk Efeitu Sanitáriu, Efeitu ekosómiku no planu estímulu ekonómika,”  Ministru Estadu Koordenadór Asuntu Ekonómiku (MEKAE) no Ministru Turizmu, Komérsiu no Indústria Ein-Ezersísiu, Fidélis Manuel Leite Magalhães, aprezenta liuhosi audisaun públika, iha plenária Parlamentu Nasionál, kinta ne’e.

Ministru Fidelis Manuel Leite Magalhães, aprezenta polítika ekonómika ne’e ba Parlamentu Nasionál liuhosi Komisaun C (Finansa Públika) no Komisaun D (Ekonomia no Dezenvolvimentu).

Nia halo previzaun ba Efeitu Sanitaria uza senáriu hosi Ministériu Saúde no Sentru Integradu Jestaun Krize (CIGC-sigla portugés), katak wainhira Timor-Leste otimista entaun iha populasaun afetadu 0% no mate 0. Menus otimista iha populasaun 5% hetan afetadu no mate 1,950, superpesimista 30% afetadu no 11,700 mate. Purtantu moderadamente otimista 1% populasaun afetadu, mate 390. Pesimista 10% afetadu no populasaun 3,900 mate.

“COVID-19 hanesan xoke (choque) ida ne’ebé prejudika ekonomia reál no perda direta ba PIB (Produtu Inernu Bruto) ne’e ita labele hasees-aan (inevitável). Kontensaun sira-ne’ebé mak ita introdús medida sanitária sira sei redús atividade ekonómika, sei halo interupsaun ba fornesimentu no queda (monu), ne’e sei afeta produsaun, venda no empregu,” Fidelis hateten.

Preokupasaun daruak kona-ba Efeitu Ekonómiku, Fildeis dehan, ne’e iha oin tolu, konfinamentu (kurungan), fornesimentu no prokura (buka).

“Konfinamentu (kurungan), sein (laiha) vasina entaun previzaun sei lori tán tempu fulan 18 katak kuarentena, restrisaun viajen no proibisaun temporária entrada hodi limita propagasaun virus,” nia dehan.

Hosi parte fornesimentu nian, tuir nia, iha atraza no falta produtu iha rai-laran sei akontese iha Timor-Leste, presu importasaun sei aumenta hanesan fós, ne’e kauza hosi lockdown rejionál no sei alastra ba merkadu mundiál.

Parte Prokura nian, Timor-Leste nia konsumu sei tún no konfiansa ba atuál ekonómiku sira sei monu tanba kauza hosi COVID-19, rendimentu rai laran sei monu.

“Ida-ne’e sei redús ema-nia podér (kapasidade) kompra, sei rezulta empreza sira barak mak sei taka. Iha redusaun iha prokura ein-jerál ita rejista redusaun ne’ebé mak konstante, importasaun no setór turizmu ita bele dehan sei paradu total,” nia hateten.

Ikus liu, Ministru Fidelis hateten, Planu Estímulu Ekonómiku iha prioridade makro haat (4), dahuluk atu apoia ba distansiamentu sosiál no saúde, nune’e insentiva pesoa, liuliu sira hela iha uma no atu ajuda medida sira-ne’ebé saúde foti bele implementa ho di’ak no efikáz.

Daruak, atu proteje ema sira-ne’ebé vulnerável liu tanba sira laiha kbiit atu asesu ba nesesidade bázika família nian. Datoluk, atu apoia no garante traballadór sira nune’e bele mantein sira-nia empregu, maski situasaun piora até balun tama iha kuarentena.

Dahaat, atu apoia empreza sira hodi evita problema falénsia no insolvénsia, nune’e sira-nia fluzu kréditu kontinua eziste no la presiza taka maibé sei fasilita di’akliu tán bainhira iha futuru tama faze rekuperasaun.

“Tanba se empreza sira mak taka hotu, faze rekuperasaun mais piór liután tanba ne’e mak medida sira-ne’ebé ita hola iha  momentu ida-ne’e ho karáter emerjénsia maibé englobe mós ita-nia preokupasaun balun ne’ebé mak sei mosu iha futuru. Só úniku dalan ba futuru mak halo intervensaun agora tanba ne’e medida nesesária sira tenke foti agora,” nia dehan.

Tuir nia, natureza hosi estímulu ekonómika ne’e temporáriu de’it, labele prolonga no labele kria fali ábitu kontinua ba tinan barak.

Totál orsamentu ba Pakote Estímulu Ekonómika ne’e hamutuk millaun $142,613,091. Hosi totál orsamentu ne’e prevee ba área estratéjiku sira hanesan konetividade ba transporte prevee orsamentu $675,009, distribuisaun bens esensiál $24,090,177, telekomunikasaun $860,000, servisu esensiál $7,949,355, kréditu $19,682,500, apoia direta $89,206,050 no komunikasaun prevee $150,000.

Tuir planu Governu nian, sei implementa hahú hosi abríl to’o fulan-agostu 2020.

Ministru Estadu Koordenadór Asuntu Ekonómiku (MEKAE) no Ministru Turizmu, Komérsiu no Indústria Ein-Ezersísiu, Fidélis Manuel Leite Magalhães, informa ba deputadu sira hosi Komisaun C no D katak bainhira iha implementasaun orsamentu ne’e la sufisiente, sei aprezenta hikas proposta orsamentu ba Parlamentu Nasionál.

Notísia Relavante: Xefe Estadu Apoiu Governu Elimina Impaktu COVID-19

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here