Foto Espesial

DILI, 23 abril 2020 (TATOLI)–Xefe Departamentu Abastesimentu Água Munisípiu Dili, Francisco Xavier Pereira hateten, durante iha situasaun Estadu Emerjénsia ne’e bee-moos sufisiente ba konsumidór sira tanba surtu COVID-19 halo abitante sira iha Kapitál Dili barak mak dezloka ba foho.

“Agora, iha situasaun Estadu Emerjénsia ne’e, ita-nia konsumidór sira asesu bee-moos sufisiente hela tanba surtu COVID-19 halo abitante sira iha Kapitál Dili barak mak dezloka ba foho,” dehan Xefe Departamentu Abastesimentu Água Munisípiu Dili, Francisco Xavier Pereira, ba Ajénsia TATOLI via telefone, kinta ne’e.

Aleinde ne’e, nia hatutan, konsumidór sira iha área urbana hotu-hotu asesu bee-moos maibé sira ne’ebé la asesu bee-moos parese kanu tohar ka intupidu ruma.

“Komunidade sira ne’ebé hela besik kanu distribuisaun bee-nian ne’e, ha’u hanoin sira asesu hotu. La asesu enkuantu problema iha kanu ruma hanesan tohar ka intupidu ruma,” nia dehan.

Tanba, nia informa, Ekipa Task Force hosi Servisu Água no Saneamentu (SAS) sempre halo kontrolu no dala ruma mós simu kontaktu hosi konsumidór sira bainhira  sira labele asesu bee, ekipa prontu atu jadua no hadi’a.

Nia subliña, iha komunidade balun ne’ebé la hetan kanu distribuisaun bee husi SAS tanba fatin ne’ebé mak sira hela uluk rai mamuk ka ema ladún iha, nune’e laiha liña distribuisaun bee-nian maibé nesesidade ekonómia ema aumenta ba beibeik entaun sira labele asesu bee-moos.

“Ami halo ona survei ba fatin balun ne’ebé mak ita-nia komunidade labele asesu bee-moos mak hanesan Bedois balu, Manleuana, Maslidun Tasi Tolu ninian, Bebonuk, Lurumata, tanba fatin refere uluk mamuk no laiha liña distribuisaun bee-nian. Sira mós komplein mai ami dehan bee-moos la to’o. Maibé, ba ami, ida ne’e hanesan fó atensaun ba ami tanba ami mak serbisu bee-nian. Entaun, ami buka maneira oinsá atu sira mós bele asesu bee-moos hodi uza,” nia hateten.

Notísia Relevante: 2020, SAS Kontinua Hadi’a Kanalizasaun Bee-Moos

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here