Ministru Justisa, Manuel Cárceres da Costa. Imajen Tatoli/Antonio Goncalves

DILI, 23 abríl 2020 (TATOLI) – Governu liuhosi Ministériu Justisa (MJ) fó izensaun temporáriu ka “la selu” renda temporáriu ba imovel-sira hosi domíniu privadu estadu nian durante fulan tolu, hosi loron 01 abríl to’o loron 30 juñu 2020.

Ministru Justisa Manuel Cárceres, luihosi komunikadu imprensa, ohin, fundamenta  katak, ho dekretu Prezidente Repúblika númeru 29/2020, 27 marsu, kona-ba estadu emerjénsia no dekretu governu númeru 3/2020,28 marsu, estabelese medida balun hanesan izolamentu terapéutiku no profilátiku obrigatóriu.

Bandu halo eventu sosiál, kulturál no desportivu, hapara atividade-sira liga ba transporte koletivu ba ema no mós regra balun relasiona ho asesu ba fatin komérsiu. Medida hirak ne’e tuir orientasaun Organizasaun Mundial Saúde (OMS) nian sai hanesan matadalan ba kontrolu propagasaun surtu Coronavirus ka COVID-19 ne’ebé lori konsekuénsia negativu ba iha atividade ekonómika rai-laran.

Liga ba pakote medida hirak iha leten governu ho intensaun atu fó apoiu rekuperasaun ekonómiku iha rai-laran. Nune’e, Ministériu Justisa (MJ) sei fó izensaun temporáriu durante fulan tolu (3)  ba arrendamentu sei “la selu” renda ba imovel-sira hosi domíniu privadu estadu nian no mós ba kontratu-sira ne’ebé nia vijénsia extende-tan liuhosi despaxu Ministériu Justisa númeru 13/2020, loron 30 marsu.

Izensaun ka “la selu” renda ne’ebé abranje ba arrendamentu hotu ne’ebé hanesan ajenda ekonómiku, ema partikulár, asosiasaun no fundasaun sira ne’ebé legalizadu mós entidade relijiozu-sira.

Iha komunikadu ne’e mós haktuir katak, izensaun ne’ebé temi iha leten la abranje ba arrendamentu sira ne’ebé halo tiha ona sub-arrendamentu ka fó aluga tutan imovel refere, maibé só arrendatáriu hatudu prova katak la kobra renda hosi sub-arrendatáriu.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here