DILI, 23 abríl 2020 (TATOLI)—Parlamentu Nasionál, aban, liuhosi konvokatóriu reuniaun líder bankada parlamentár sira sei deskute no aprova ajenda ba estensaun Estadu Emerjénsia (EE) hafoin lori ba plenária hodi diskute liuliu ba apresiasaun no ajendamentu ba renovasaun deklarasaun Estadu Emerjénsia.

Tuir ajenda ne’ebé Agência TATOLI, asesu hosi relasaun públika Parlamentu Nasionál, katak konvokatóriu estraordinária ne’e sei hala’o iha loron 24 abríl, tuku 10:00, iha sala Konferénsia Parlamentu Nasionál.

Meza Parlamentu Nasionál marka ajenda ne’e hafoin simu karta hosi Prezidente Repúblika, Francisco Guterres ‘Lú Olo’, iha loron kuarta (22 abríl 2020).

Iha ajenda ne’e foka liu ba apresiasaun no ajendamentu ba renovasaun deklarasaun Estadu Emerjénsia iha territóriu nasionál, iha termu alínea g artigu 85 Konstituisaun RDTL.

Konstituisaun RDTL artigu 85 (Kompeténsia rasik), alínea g, hateten deklara estadu serku nian ka estadu emerjénsia, tuir Parlamentu Nasionál haruka, bainhira rona tiha ona Konsellu-Estadu, Governu no Konsellu Superiór Defeza no Seguransa nian.

Vise-Prezidente Parlamentu Nasionál, Deputadu Luis Roberto, fó-sai katak parlamentu simu karta estensaun hosi Prezidente Repúblika, iha loron kuarta horisehik.

“Karta ne’e meza Parlamentu Nasionál simu horisehik no ohin ami meza parlamentu tuur hamutuk depois ohin kedas ami dehan ba DIPLN (Divizaun Apoia Plenária) distribui ba bankada hotu-hotu hodi bele asesu ba informasaun ne’e, aban mak ami reuniaun líder bankada para deside tau ba ajenda. Aumenta ka lae ne’e plenária mak sei deside,” Deputadu Luis Roberto, informa ba jornalista sira, iha Parlamentu Nasionál, kinta ne’e.

Vise-Prezidente ne’e dehan, karta ne’ebé haruka hosi Xefe Estadu husu Parlamentu Nasionál autoriza Estadu Emerjénsia ne’e komesa hosi 27 abríl ba to’o iha 26 maiu 2020.

Notísia Relavante: KE-KSDS Rekomenda ba Xefe Estadu Husu PN Estende Estadu Emerjénsia

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here