Sekretariu Estadu Komunikasaun Sosiál, Merício Juvinal dos Reis ‘Akara’, konvoka reuniaun ho dirijente PCIC,TIC no ANC, iha sala reuniaun SEKOMS, Palásiu Governu, kuarta ne’e. Imajen/Mídia SEKOMS

DILI, 22 abríl 2020 (TATOLI) – Sekretaria Estadu Komunikasaun Sosiál (SEKOMS) realiza enkontru prelemináriu ho parte kompetente hanesan Polísia Sientífika Investigasaun Kriminál (PCIC, sigla portugés), Teknolojia Informasaun no Komunikasaun (TIC, sigla portugés), no Autoridade Nasionál Komunikasaun (ANC, sigla portugés ).

Iha enkontru ne’e, parte hotu konkorda hodi kontribui ba prevensaun no kombate informasaun falsu ka hoax iha rede sosiál, nune’e labele halo pániku públiku iha períodu imprementasaun Estadu Emerjénsia (EE).

“Ohin ami konkorda iha situasaun ida-ne’e ita tenke kontribui. Nune’e ami konkorda malu atu iha enkotru ida tan no sei envolve operadór sira hotu hotu hanesan Timor Telekom, Telkomsel no Telemor, atu lideransa operadór sira haree desizaun ruma atu uza hodi kombate lia falsu ka hoax. Enkontru ohin pozitivu no ativu, ami simu informasaun di’ak no kapas, inklui informasaun husi tékniku balun liga ho parte legál”, dehan   Sekretariu Estadu Komunikasaun Sosiál, Merício Juvinal dos Reis ‘Akara’, hafoin ramata enkontru ho parte kompetente sira iha Palásiu Governu, kuarta ne’e.

Tuir governante ne’e, iha situasaun agora presiza tebes parte hotu ninia kontribuisaun hodi prevene hoax no labele husik ema ida atu uza oportunidade liuhosi COVID-19 no Estadu Emerjénsia, hodi lansa informasaun oin-oin, nune’e públiku mantein kalma iha situasaun hanesan ne’e.

“Ita bo’ot sira hatene situasaun ida agora hanesan situasaun emerjénsia. Ita hotu tenke konsentra atu kombate CoVID-19, maibé ema balun aproveita situasaun ne’e no lansa fali informasaun falsu ka hoax, hafoin la’ós ida ne’e de’it maibé uza informasaun falsu maka ataka ema nia dignidade, tolok ema deskredita ema, tanba ne’e barak maka la kontente no ita-nian líder mós la kontente, ita-nian Parlamentu mós la kontente kona-ba situasaun ida ne’e. Entaun parte Governu hanoin katak tempu ona ita halibur ideia atu responde situasaun ida ne’e”, nia akresenta.

SEKOMS Konsidera Iha Espasu Halo Prevensaun Informasaun Hoax

Nia adianta, presiza rekoñese katak Timor-Leste seidauk iha lei ne’ebé atu regula kontiúdu rádiu, televisaun no mídia online maibé to’o agora seidauk iha lei kona-ba informasaun transaksaun eletrónika ne’ebé maka atu haree sé maka prodús informasaun falsu konsidera krime, inklui ema ne’ebé maka fahe tutan informasaun ne’e mós krime.

“Governu buka nafatin meiu hodi prevene hoax sira ne’ebé maka iha rede sosiál. Bainhira ita-nia lei seidauk iha, ita iha espasu atu halo prevensaun. Tanba ne’e maka ami hahú troka idea atu ita kontribui ba situasaun agora kontra hoax ne’e, hodi kontinua redús informasaun falsu no rumoris”, Akara salienta.

Iha fatin hanesan Diretór Nasionál PCIC, Vicente Fernandes Brito, dehan liuhosi reuniaun ida entre SEKOMS, PCIC oferese hanoin ne’ebé maka kontrutivu bainhira EE ne’e prolonga maka PCIC bele kontribui fó porsaun maka’as liu, la’ós ba represivu maibé ba prevensaun.

Tuir nia, prevensaun ne’e la’ós de’it iha kapasidade ekipamentu rekursu umanu, maibé haree liu ba iha instrumentu legál tanba situasaun EE ida agora ne’e nu’udar situasaun esepsionál la hanesan ho situasaun bain-bain.

“Dekretu Governu kona-ba EE bele kontein buat ruma atu nune’e bele kontribui ba prevensaun jerál ka espesiál ba ema ne’ebé uza situsaun esepsionál ne’e hosi fó informasaun falsu no halo públiku pániku. Kuandu ema pániku ne’e signifika ita fó ona informasaun ne’ebé maka afeta ba trakilidade”, realsa Vicente.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here