Vise Xefe Bankada Parlamentár PLP, Francisco de Vasconcelos. Imajen/ Egas Cristovao.

DILI, 22 abríl 2020 (TATOLI)—Bankada Partidu Libertasaun Populár (PLP) konsidera preokupasaun públiku kona-ba orsamentu $500.000 ne’e pertinente tanba Parlamentu Nasionál hadau kompeténsia Governu nian.

Xefe Bankada Parlamentár PLP, Francisco de Vasconcelos hateten, PLP vota kontra tanba iha justifikasaun sumária ne’e hateten orsamentu ne’e ba dezenvolve polítika atu kombate COVID-19 maibé iha deklarasaun dehan atu reforsa hodi ba halo fiskalizasaun.

“Preokupasaun públiku kona-ba $500 mill ($500.000) ne’e pertinente tanba parlamentu haree de’it ba nia kabun. Loloos ne’e osan $500.000 ne’e labele. Tan ne’e mak ami vota kontra. Iha sira-nia (Bankada CNRT) justifikasaun sumária ne’e dehan katak ba dezenvolve polítika atu kombate COVID-19 maibé sira-nia deklarasaun dehan katak reforsa hodi ba halo fiskalizasaun, ne’e hadau kompeténsia governu nian,” Vise Xefe Bankada Parlamentár PLP, Francisco de Vasconcelos, informa ba jornalista sira iha Parlamentu Nasionál, kuarta ne’e.

Nia esplika, parlamentu aprova pedidu levantamentu ho montante millaun $250, hosi orsamentu ne’e millaun $100 reforsa kofre estadu hodi finánsia duodésimu no millaun $150 prevé ba fundu COVID-19 no hosi millaun $150 ne’e koloka $500.000 ba Parlamentu Nasionál hodi halo fiskalizasaun kombate COVID-19.

Nia dehan, parlamentu foti $500.000 ho justifikasaun atu dezenvolve programa kombate COVID-19 ne’e la loos. Polítika ba dezenvolve kombate COVID-19 ne’e Governu nia kompeténsia tanba parlamentu só halo fiskalizasaun de’it.

“Piór liu, proposta ba orsamentu ne’e la aprova liuhosi Konsellu Administrasaun Parlamentu Nasionál nian. Loloos ne’e proposta sira mai hosi komisaun no komisaun lori ba Konsellu Administrasaun. Konsellu Administrasaun haree programa depois haree orsamentu, aprova orsamentu depois lori mai Komisaun C (Finansa Públika). Komisaun C halo nia relatóriu no pareser hafoin lori ba plenária ka bele husu ba Prezidente Parlamentu Nasionál katak bele konsidera ida-ne’e tanba prenxe rekezitu no rejimentál,” nia dehan.

Maske nune’e, Deputadu PLP ne’e esplika, foin lalais ne’e Prezidente Parlamentu Nasionál lori osan $500.000 ne’e liuhosi dalan terik (tikus) no direitamente ba plenária. Ne’e hatudu Prezidente Parlamentu sees hosi Konsellu Administrasaun tanba nia hatene katak liuhosi Konsellu Administrasaun konserteza la pasa, entaun prezidente lori direitamente ba plenária, ne’e viola prosesu administrativu.

“Ha’u hein hela Konsellu Administrasaun, sira lori ba ami sei la apoia atividade ne’e, ne’e inventa de’it. Ami sei husu osan ne’e fó de’it ba governu mak jere. Parlamentu uza de’it orsamentu duodésimu ne’e tanba sufisiente hela ba halo atividade fiskalizasaun,” nia hateten.

Hatán ba preokupasaun ne’e, Deputadu Partidu CNRT, Domingos de Carvalho hateten, espekulasaun iha rede sosiál halo deputadu sira sai vítima tanba orsamentu $500.000 seidauk uza ba halo fiskalizasaun.

Deputadu CNRT ne’e esplika, parlamentu aprova ona millaun $250, hosi millaun $250 ne’e millaun $150 tau ba fundu COVID-19 no millaun $100 reforsa saldu tezouru.

“Hosi millaun $150 ne’e mak parlamentu hasai $500 mill ne’e  maibé la’ós hasai diretamente ba finansa parlamentu nian, ne’e iha Banku Sentrál Timor-Leste. Kuandu ami planeia ba halo fiskalizasaun foin halo pedidu ba Ministériu Finansa la’ós ba foti direta hanesan ema sira ko’alia iha facebook ne’e,” nia esplika.

Notísia Relevante: Konstituisaun Obriga PN Fiskaliza Ezekusaun Fundu COVID-19

Jornalista : Evaristo Soares Martins

Editór      : Cancio Ximenes

2 KOMENTÁRIU

  1. Iha ita nia nasaun ida ne’e, provizoriamente ba EE ida nebe prioridade liu, hau hanoin nesesidade liu mak povu nebe iha klas bawahan hanesan povu nebe laiha duni kbit atu nesesita sira nia moris, governu nunka voka idane’e, tanba saida?

  2. Sr. Deputado Domingos esplika lalos liu,…karik povu la kontrola liu husi kritika nebe halo liu husi media karik, osan ne sei uza duni ba interese PN.
    Parabens ba maun alin Evaristo Soares Martins.
    Maun alin STM Becora 2004-2007. Dep. Eletricidade
    Obrigado.
    Antonio Soares Martins, Ermera

HAKEREK NO HATÁN

Please enter your comment!
Please enter your name here