Ministru Obra Públika, Salvador Eugênio Soares dos Reis Pires. Imajen Tatoli/Florencio Miranda Ximenes

DILI, 22 abríl 2020 (TATOLI) – Ministru Obra Públika, Salvador Eugênio Soares dos Reis Pires, hateten, dadaun ne’e parte tékniku Ministériu Obra Públika (MOP) prepera hela proposta atu sumbmete ba Sentru Integradu Jestaun Krize (CIGC, sigla portugés) atu asesu fundu COVID-19.

“Ami nia proposta maka atu fó subsídiu ba ami-nia tékniku sira ne’ebé presta hela servisu durante períodu Estadu Emerjénsia, inklui tékniku Eletricidade de Timor-Leste (EDTL) no Servisu Água no Saneamentu (SAS)”, tenik Ministru Salvador ba Agência Tatoli, iha edifísiu Ministériu Finansa, Aitarak-Laran, kuarta ne’e.

Tuir Ministru Salvador, intensaun atu fó subsísiu ne’e tanba tékniku sira barak maka ho saláriu mínimu $115 kada fulan, maibé sira mós aposta ba risku COVID-19, tanba  kuandu eletrisidade inklui Água no Saneamentu hetan avaria ruma sira tenke halo atendimentu.

Notísia Relevante: KM Aprova Dekretu Ezekusaun ba Fundu COVID-19

Nia haktuir, foin daudaun eletrisidade avaria iha Klínika Vera Cruz no ekipa téknika sira ba halo atendimentu iha fatin konfinamentu ba pasiente positivu COVID-19.

“Entaun sira iha risku ba kontaminasaun ba vírus ne’e. Ha’u nia staff sira ne’e, liuliu tékniku sira ne’ebé presta hela servisu bázika ba atendimentu avaria loron-loron ne’e iha períodu Estadu Emerjénsia ne’e sira tenke hetan netik subsídiu ruma”, nia adianta.

Governante ne’e dehan, Konsellu Ministru aprova ona Dekretu-Lei ezekusaun COVID-19, liuliu ba lejizlasaun sira ne’ebé liña ministeriál husu atu halo revizasaun liuhosi Ministrériu Finansa no Ekipa Gabinete Primeiru Ministru hodi fasilita hatama lista téknika sira atubele hetan subsídiu.

“Dekretu-Lei ne’e hetan aprovasaun bazeia ba alterasaun ne’ebé maka ami husu ne’e, ne’ebé kuandu públika ona ami bele submete ona proposta ne’ebé dezenvolve husi Diresaun Jerál EDTL no Servisu Água no Saneamentu ba asesu subisídiu, maibé ami sei hare ida-ne’e,” nia afirma.

Nia afirma, valór ne’ebé atu propoin seidauk aprezenta tanba Konsellu Ministru foin aprova Dekretu-Lei ezekusaun. Tanba ne’e parte MOP seidauk aprezenta proposta tanba tékniku sira sei elabora hela.

“Ami nia lista téknika EDTL kuaze ema na’in-340 no Água no Saneamentu hamutuk na’in-140. Ida ne’e mak ami tau hela, maibé montante proposta ne’e ami sei haree lai tanba foin iha aprovasaun Dekretu-Lei ba ezekusaun Fundu COVID-19, ne’ebé seidauk define montante hira iha proposta no kada tékniku ida hetan subsídiu hira”, nia afirma.

Antes ne’e, Prezidente Repúblika promulga ona Dekretu Parlamentu Nasionál númeru 14/V, kona-ba autorizasaun ba realizasaun transferénsia estraordinária husi Fundu Petrolíferu ho montante millaun $ 250.

Husi totál orsamentu millaun $250 ne’ebé aprovadu iha Parlamentu Nasionál, millaun $150 aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba Konta Jerál Tezouru no hosi millaun $150 ne’e, aloka $500.000 ba Parlamentu Nasionál atu dezenvolve polítika no programa iha ámbitu prevensaun no kombate surtu COVID-19.

MOP daudaun ne’e realiza ona fó subsídiu eletrisidade pre-pagu $15 ba kada kliente EDTL, husi totál kliente 160.555, durante períodu Estadu Emerjénsia no sei ramata iha loron 26 abríl 2020.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here