Kondisaun komunidade sira ninia uma, ne’ebé hela besik mota-ninin Bidau hetan estragu hafoin udan-boot no provoka inundasaun sesta lorokraik (13/03). Imajen Tatoli/António Gonçalves

DILI, 22 abríl 2020 (TATOLI) – Ministru Obra Públika, Salvador Eugênio Soares dos Reis Pires, informa ekipa Task Force liuhosi ekipa legál haree ona legalidade projetu sira atu halo kontratu hodi hahú hala’o rekuperasaun ba estragu sira kauza inundasaun husi udan boot iha 13 marsu tinan ne’e.

“Ami-nia ekipa legál haree hela legalidade tuir rejime jurídiku aprovizionamentu artigu 92 no 94, atu haree projetu balun ne’ebé tama ba ajudikasaun direta tanba emerjénsia ne’ebé ita envia ona ba Konsellu Nasionál Aprovisionamentu (CNA, sigla portugés) atu dezenvolve ninia kontratu hodi asesu ba fundu infraestutura hodi halo rekuperasaun no ba sira ne’ebé la tama kategoria emerjénsia ita halo prosesu normál tanba nia kobertura orsamentu iha”, tenik Ministru Salvador ba Agência Tatoli, iha edifísiu Ministériu Finansa, Aitarak-Laran, kuarta ne’e.

Projetu sira ne’e, hetan ona aprovasaun iha Konsellu Administrasaun Fundu Infraestrutura (KAFI) no tenke halo fali kualifikasaun atu justifika katak projetu sira ne’e tama duni kategoria emerjénsia ka lae, ne’ebé fó impaktu ba seguransa públiku no saúde públiku nian.

Governante ne’e informa, kategoria projetu emerjénsia kuaze pakote husi 23-resin inklui hadi’a Eskola 5 de Maio, Sergio Veira de Melo no seluk tan, ne’ebé daudaun ne’e ekipa Task Force  kompostu Diresaun Jerál Obra Públika, Água no Saneamentu, Eletrisidade, Ajénsia Dezenvolvimentu Nasionál (ADN) ho Komisaun Nasionál Aprovizionamentu (CNA, sigla portugés) halo levantamentu dadus.

“Faze dahuluk ami halo ona aprovasaun ne’ebé sei haree hela nia vizibilidade tuir lei no sei avansa liuhosi tipu aprovizionamentu hanesan ajudikasaun direita atu kompañia sira hahú rekuperasaun”, nia akresenta.

Ministru ne’e informa, kompañia sira ne’e tuir despaisu Primeiru-Ministru fó kompeténsia ba ekipa Task Force ne’ebé mak fó rekomendasaun bazeia ba sira nia kapasidade rekursu finanseiru no ekipamentu pezadu.

“Ita-nia ekipa Task Force aprezenta ona kompañia sira ba ona Konsellu Ministru mai KAFI, ne’ebé kada projetu ida kaet husi kompañia ida,” nia akresenta.

Ho nune’e, nia salienta, hafoin ekipa legál finaliza  ona maka bele fó kompeténsia ba CNA atu hahú kontrata kompañia sira atu mobiliza ekipamentu hodi hala’o rekuperasaun ba infraesturura sira ne’ebé hetan estragu husi inundasaun.

Konsellu Administrasaun Fundu Infraestutura (KAFI) aprova ona millaun $15 ba kustu estimasaun estragu husi inundasaun, ne’ebé aprezenta husi ekipa Task Force ne’ebé lidera husi Ministériu Planeamentu, Investimentu no Estratéjiku (MPIE) no Ministériu Obra Públika (MOP).

Ekipa Task Force ne’e, kompostu husi ministériu rua ne’ebé aprezenta ona kustu estimasaun hodi bele halo rekuperasaun ka hadi’a estragu hanesan estrada, ponte, eletrisidade, kanalizasaun bee-moos no eskola sira kuaze obra emerjénsia hamutuk 23-resin, ne’ebé maioria lokaliza iha kapitál Dili, inklui munisípiu balun ne’ebé afetadu husi inundasaun.

Ekipa Task Force estabelese bazeia ba despaisu husi Primeiru Ministru, Taur Matan Ruak, husi rezultadu enkontru ho KAFI, inklui entidade relevante sira hanesan ADN, CNA no SGP no mós ajénsia sira ne’ebé tutela iha MOP hanesan Diresaun Jerál Obra Públika, Servisu Agua no Saneamentu (SAS) no Eletricidade de Timor-Leste (EDTL).

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here