Ministra Edukasaun, Juventude no Desportu Dulce de Jesus Soares. Imajen/António Gonçalves.

DILI, 22 abríl 2020 (TATOLI)-Governu liuhosi Ministériu Edukasaun Juventude no Desportu (MEJD) sei dezeña matéria ba estudante sira ne’ebé maka durante ne’e la asesu programa eskola ba Uma.

Ministra Edukasaun Juventude no Desportu, Dulce de Jesus Soares rekoiñese estudante barak iha área rurál maka la asesu programa eskola ba uma ne’ebé durante fó sai liuhosi kanál RTTL,ep, GMN TV, TVE, no seluk tan.

Notísia Relevante :Implementasaun “Eskola Ba Uma” iha Situasaun Emerjénsia ba Surtu COVID-19 iha Timor-Leste

“Ba sira ne’ebé mak la asesu programa eskola ba uma ne’e, Ministériu dezenha ona matéria balun atu reforsa estudante sira iha tempu aula bainhira hahú fila-fali,”dehan Governante ba Jornalista Sira hafoin reuniaun Konsellu Ministru, iha Edifísiu Ministériu Finansa, Ai-Tarak-Laran, Dili, kuarta ohin.

Tuir nia, MEJD sei distribui matéria ne’e ba eskola hotu-hotu hodi hanorin estudante sira bainhira situasaun COVID-19 rezolvidu iha rai-laran.

“Ministeriu ho konsensia tomak hatene katak la’ós estudante hotu iha kondisaun atu asesu ba televizaun, internet no radiu iha Kapitál satan iha Munisípiu sira liu-liu iha área rurál,” katak Dulce.

Notísia Relevante :MEJD Rekoñese Estudante Pursentu 30 La Asesu Programa Eskola ba Uma

Ba estudante sira ne’ebé maka akompaña ona programa eskola ba uma atu aproveita oportunidade ne’e hodi estuda iha uma durante feriadu.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here