Komandau F-FDTL demite Primeiru Sarjentu, Abreu Ramos da Costa husi membru F-FDTL, kuarta (22/04/2020). Imajen/Nelson de Sousa

DILI, 22 abríl 2020 (TATOLI)-Komandu FALINTIL-Forsa Defeza Timor-Leste (F-FDTL), ohin, iha Kuartél Jenerál, Fatuhada, Dili, ofisiálmente demite ona Primeiru Sarjentu Abreu Ramos da Costa, bazeia ba   despaixu Xefe Estadu Maiór Jenerál F-FDTL, Majór Jenerál Lere Anan Timur nian.

Notísia Relevante :F-FDTL Kontinua Tane Lema FALINTIL, “Povu Mak Bee, FALINTIL Mak Ikan” 

Komandau F-FDTL demite Primeiru Sarjentu, Abreu Ramos da Costa husi membru FFDTL, kuarta (22/04/2020). Imajen/Nelson de Sousa

Despaixu  Majór Jenerál nian, loron 05 marsu 2020 ne’e, ho konformidade hosi desizaun Tribunál Distritál Dili (TDD) ne’ebé aplika pena prizaun tinan haat (4), fulan neen (6) ba Primeiru Sarjentu Abreu Ramos da Costa, tanba komete kazu krime ida iha tinan 2015.

Ho nune’e komandu F-FDTL deside halo separasaun serbisu determina ba prosesu refere hahú loron 22 abríl 2020, Abreu Ramos da Costa, sai hosi vida militár ba vida sivíl hodi hamutuk ho sosiedade no kumpre pena ne’ebé iha.

Iha despaixu Majór Jenerál nian ne’e mós subliña katak, Abreu Ramos da Costa,  lakon nia kualidade hanesan militár no labele ona utiliza uniforme ka emblema militár nian tuir artigu 27 regulamentu disiplinár militár nian.

Xefe Divizaun Pesoál Tenente Coronel Constâncio Moreira, konfirma katak, eis Primeiru Sarjentu Abreu Ramos da Costa, komete kazu ida iha tinan 2015 bainhira atu ba trata asuntu familiar hamutuk ho família to’o iha area dalan Tibar nian, maka ema atake eis sarjentu refere no iha altura ne’ebá nia responde kontra asaun halo defeza ba ema ne’ebé ataka.

“Kona-ba kazu saida, imi ba husu Ministériu Públika mak hatene, maibé automatikamente militár kuandu hetan ona kódigu justisa antes atu kumpre pena ida ne’e, iha instituisaun rasik halo kedas separasaun serbisu tanba kontra regulamentu disiplinár,” nia afirma tan.

Eis Primeiru Sarjentu Abreu Ramos da Costa hahú hala’o nia kna’ar iha vida militár hahú iha tinan 2004 tanba ne’e, Tenente Koronél Constâncio Moreira, lori instituisaun F-FDTL no Komandu F-FDTL nia-naran  hato’o agradese ba eis Sarjentu Abreu Ramos da Costa ninia dedikasaun tomak durante ne’e ba F-FDTL.

Nia mós hato’o Mensajen katak, militár ninia dalan mak bainhira halo los defende karreira profisionál, maibé bainhira sala mak sei lakon direitu tomak iha vida militár, tanba ne’e tenke kumpre ba regra hotu ne’ebé hatuur.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here