Prezidente Repúblika, Francisco Guterres Lú Olo, Prezide Reuniaun Konsellu Superior Defeza no Seguransa, Iha Palásiu Prezidente Nicolau Lobato, Bairru Pité, Dili, Kuarta (22/04/2020). Imajen/Egas Cristovão.

DILI, 22 abril 2020 (TATOLI)–Hafoin reuniaun Konsellu Estadu no Konsellu Superiór Defeza no Seguransa, konsellu rua ne’e ho unanimidade rekomenda ba Prezidente Repúblika Francisco Guterres “Lú Olo” atu haruka karta ba Parlanentu Nasionál hodi halo estensaun ba Estadu Emerjénsia. 

Xefe Kaza Sivil Prezidénsia Repúblika, Francisco María de Vasconcelos ko’alia asuntu ne’e, hafoin enkontru membru Konsellu Estadu no Konsellu Superior Defeza no Seguransa ho Prezidente Repúblika iha salaun Xina Palásiu Prezidensiál
Bairru Pité, Dili.

“Detallu kona-ba Estadu Emerjénsia ne’e hanesan nafatin ida uluk. Agora ne’e, Governu presija atu halo medida ne’ebé di’ak liu, atu povu bele hatene loloos kona-ba Estadu Emerjénsia no mós moras Coronavirus (COVID-19). Intensaun atu hanaruk Estadu Emerjénsia nee ho objetivu ida de’it maka Estadu ho governu hadomi nia povu ida ne’e, hakarak atu salva povu ida ne’e hosi moras no husi mate. Ida ne’e mak prinsipál liu no ba detallu sei regula hosi dekretu implementasaun ne’e hosi governu. Konsellu rua ne’e rekomenda unanimidade ba Prezidente Repúblika, bele haruka karta atu husu estensaun ba Estadu Emerjénsia,” Xefe Kaza Sivil esplika.

Entretantu, Estadu emerjénsia ne’ebé Prezidente Repúblika dekreta iha 27 marsu sei remata iha 26 abril 2020. Maibé haree ba situasaun surtu COVID-19 iha Timor-Leste ho kazu konfirmadu hamutuk 23 no rekuperadu 1, Governu hato’o proposta estensaun estadu emerjénsia nu’udar dalan di’ak liu ba prevensaun no kombate moras aat ne’e. Governu propoin estensaun estadu emerjénsia ba fulan ida tan, hahú husi 27 abril-26 maiu 2020.

Pandemia COVID-19 iha Estadu Membru ASEAN ninian hada’et ema liu rihun 27 no ema mate liu rihun ida. Mundialmente, iha ema hamutuk rihun 168 ne’ebé mate no hada’et ba ema liu millaun 2.

Konsellu Estadu ne’ebé Marka prezensa iha reuniaun ne’e mak hanesan, Atual xefe Estadu, Francisco Guterres “Lú Olo”, eis Prezidente Repúblika José Ramos Horta, atual Prezidente Parlamentu Nasionál Arão Noé de Jesus da Costa Amaral, atuál Primeiru Ministru Taur Matan Ruak, membru sira ne’ebé Parlamentu Nasionál hili mak hanesan, José Marcelino Cabral Belo, Aurora Ximenes, Virgílio da Costa Hornai, Virgílio Smith, José dos Santos Naimori Bukar, no membru sira ne’ebé nomeia hosi atuál Prezidente Repúblika mak hanesan, Oscar Lima, Faustinho Goudinho Gonçalves da Costa, Alcino de Araújo Barris, Maria Dadi Soares Magno, no Laura Soares Abrantes.

Entretantu, Membru Konsellu Superior Defeza no Seguransa ne’ebé partisipa iha reuniaun ne’e mak Prezidente Repúblika Francisco Guterres “Lú Olo”, Primeiru Ministru Taur Matan Ruak, Ministru Negosiu Estranjeiru no Kooperasaun Dionísio Babo, Ministru Defeza no Seguransa Filomeno Paixão, Ministru Justisa Manuel Carceres, hosi Parlamentu Nasionál, Aderito Hugo da Costa, David Dias Ximenes, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa, no José Manuel Fernandes ‘Nakfilak’ no observa direta husi Eis Primeiru Ministru no Ministru Saúde Rui Araújo no Infectologista Danina Coelho no Diretór Ezekutivu FONGTIL Daniel Santos.

Notísia Relevante: Aban, Xefe Estadu Prezide Reuniaun KE-KSDS ba Estensaun Estadu Emerjénsia

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here