Hakerek nain, Memensio Sequeira Freitas.

(Prespetiva pesoál hosi ajente edukativu ida iha Timor-Leste)

Hosi: Memensio Sequeira Freitas*)

Mundu dijitalizasaun ohin loron fó biban ba ema hotu iha sítiu hotu-hotu atu halo komunikasaun ho fasilmente no imediatu. Produtu sira hosi dijitalizasaun hirak ne’e fasilita tebtebes atu ema halo komunikasaun ba malu iha tempu badak nia laran, para aleinde asesu ba informasaun no teknolojia oioin iha mundu kontemporánea ida ne’e.

Ita bele dehan, komunikasaun ohin loron tama ona iha era mileniál, mezmu dispozitivu no aplikasaun modernu oioin sei mosu nabnaban iha tempu sira oin mai. Maibé, pelu menus era dijitalizasaun ida iha ita-nia oin daudaun ne’e, fasilita ona iha aspetu barak nian laran, inkluindu aspetu edukasaun nian.

Mundu edukasaun ohin loron la konsentra de’it ona iha sala de aula laran no liuhosi enkontru direta entre alunu-profesór. Fasilidade sira hosi dijitalizasaun nian fasilita mós atu prosesu edukasaun ka ensinu aprendizajen bele hala’o hosi fatin ketaketak. Katak, alunu-profesór hela iha ida-idak nia fatin maibé komunikasaun entre sira la’o nafatin iha tempu ne’ebé hanesan.

Prosesu edukasaun sira hanesan ne’e mak ita hanaran “eskola distánsia ka eskola online” ou iha termu Timór nian ita hanaran “Eskola Ba Uma”, ne’ebé Ministériu Edukasaun no

 Juventude Desportu (MEJD) aplika daudaun iha momentu Estadu Emerjénsia ba surtu COVID-19.

Maibé, saida loos mak eskola distánsia?

Simonson (2006) iha nia artigu ida intituladu Teaching and learning at distance: Foundation of distance education (3rd ed.), haktuir katak eskola distánsia (ho lian inglés: Distance Education) mak edukasaun formál ida ne’ebé habaze ba instituisaun ida mak envolve alunu ho profesór hela iha fatin ketaketak no tanba ne’e nesesita sistema telekomunikasaun interativu ida atu bele liga ka junta parte rua ba malu no ho rekursu oin-oin ne’ebé nesesáriu iha prosesu nia laran. Prosesu aprendizajen eletróniku ka koñesidu ho E-Learning ou eskola online nu’udar parte ida hosi eskola distánsia ne’ebé partikularmente liga teknolojia eletróniku no teknolojia sira ne’ebé habaze ba internet.

Avansu sira iha mundu teknolojia komunikasaun no informasaun hamosu posibilidade no mós dezafiu foun iha mundu edukasaun. Posibilidade foun ne’ebé mak mosu inklui ona asesu ne’ebé luan ka estendidu ba iha konteúdu sira multimédia nian ho dezenvolvimentu métodu ensinu foun ne’ebé la limita hosi tempu no espasu.

Iha sikun seluk, avansu teknolojia ho inovasaun oin-oin dijitál nian ne’ebé kontinua la’o hamosu dezafiu foun no todan uitoan (ba nasaun sira ne’ebé foin aplika hanesan ita-nian), ba estabelesimentu edukasaun ho distánsia atu bele adapta aan tuir infrastrutura edukasaun nian ho teknolojia foun refere.

Sientista edukasaun nian balu mak fó sira-nia pontu de vista kona-ba saida mak eskola distánsia. Sinetista Edukasaun Dhomen (1967, p. 2) haktuir; “Edukasaun distánsia mak forma ida hosi prosesu aprendizajen independente ne’ebé organizadu sistemátikamente, iha ne’ebé akonselamentu, aprezentasaun ba matéria no avaliasaun no fiskalizasaun ba rezultadu estudu nian hala’o hosi grupu edukadór balun mak iha responsabilidade diferente entre instrutór ida ho sira seluk.

Prosesu aprendizajen akontese hosi fatin separada no utiliza ajudu hosi média ka fasilidade eletróniku. Kontráriu hosi eskola distánsia mak edukasaun direita ka hasoru malu entre alunu-profesór, nu’udar sistema aprendizajen ne’ebé mak akontese tanba iha kontatu direita entre alunu ho nia manorin iha sala de aula”.

Atu eskola distánsia ka eskola ba uma ne’e bele la’o ho susesu no efetivu, péritu balu hanesan Mulyo Prabowo iha nia artigu intituladu “Manfaat Sekolah Jarak Jauh Terhadap Siswa-Siswi” ne’ebé públika iha jornál akadémiku edukasaun Indonézia nian, haktuir iha aspetu lubuk ida ne’ebé korresponde no influénsia malu, hodi bele haree katak eskola distánsia ne’e efetivu duni ka lae. Fatór ka aspeitu sira ne’ebé fasilita eskola distánsia mak hanesan tuir mai ne’e:

  1. Iha fasilidade eletróniku (Televizaun ka telemóvel android ho nia aplikasaun sira);
  2. Rede internet ne’ebé ho velosidade di’ak;
  3. Enerjia eletrisidade nian ne’ebé asesuável;
  4. Vontade di’ak hosi alunu sira atu estuda autónomo;
  5. Kapasidade autonomia (independente) hosi alunu sira atu partisipa eskola distánsia ka eskola ba uma;
  6. Entuziasmu hosi alunu sira hodi partisipa iha prosesu aprendizajen distánsia no bele halo interasaun ativa ho tutor ka instutór liu hosi online;
  7. Kuriozidade hosi alunu sira atu aprende no deskobre rasik siénsia sira ne’ebé relevante ho unidade kurríkulu ne’ebé aprezenta liu hosi eskola distánsia;
  8. Envolvimentu no asisténsia hosi inan-aman atu motiva no ajuda alunu sira iha uma.

Nune’e, bele dehan fatór sira iha leten ne’e inklui ona fatór interna no mós fatór esterna ne’ebé iha nia relasaun resíproku entre aspeitu ida ho aspeitu seluk.

Matenek na’in Y. Wisnurat (2009) iha nia estudu kona-ba estuda online, aprezenta vantajen tolu ne’ebé alunu sira bele hetan bainhira iha vontade atu partisipa iha eskola distánsia nian. Vantajen tolu ne’e mak hanesan tuir mai ne’e:

  1. Efisiente, katak eskola distánsia ka eskola ba uma iha ninia konseitu ne’ebé klaru, iha ne’ebé alunu sira bele estuda iha ne’ebé de’it no bainhira de’it. Purtantu, la iha limitasaun ba tempu no espasu. Ida ne’e tanba konteúdu hotu-hotu no prosesu aprendizajen bele asesu liu hosi portáteis (laptop) ka telemovel android ruma, basta iha konesaun di’ak ho rede internet (bele mós liu hosi kanál televizaun no rádiu iha uma hanesan akontese daudauk iha ita-nia rain).
  2. Efetivu, katak bele lori rezultadu ne’ebé di’ak bainhira alunu sira partisipa ho atentu, ativu, interativu, kriativu no inovativu. Eskola distánsia bele sai nu’udar esperiénsia foun ida (iha kontestu Timor-Leste), modelu aprendizajen ida ne’ebé iha konetividade no integradu ho fasilidade teknolojia no informasaun nian. Eskola distánsia ne’e efetivu tanba material aprendizajen sira ne’e full access (katak bele aprezenta matéria aprendizajen hotu-hotu ne’ebé iha relasaun ho konteúdu ka sub konteúdu sira), estuda tuir nível asalerada apropriadu hosi alunu nian no bele halo avaliasaun iha kualker tempu ka bainhira de’it.
  3. Transparante, alunu sira bele hatene kedas sira-nia progeresu estudu nian kazu iha avaliasaun ruma liuhosi eskola ba uma.

Iha Timor-Leste ho situasaun surtu COVID-19 no tanba Estadu RDTL liu hosi Prezidente Repúblika ne’ebé dekreta ona Estadu Emerjénsia iha loron 28 marsu liu ba, paraliza hotu atividade sosiál no ekonómiku, inklui atividade aprendizajen iha eskola sira. Antes deklara Estadu Emerjénsia, MEJD liu hosi exelénsia doutora Dulce de Jesus Soares deklara ona atu suspende atividade eskola nian tomak hahú hosi loron 23 fulan marsu durante semana ida.

Maibé, tanba Estadu dekreta ona Estadu Emerjénsia mak MEJD halo mós adaptasaun hodi kontinua suspende atividade sira eskola nian. Biar nune’e, MEJD mós buka meius atu dezenvolve eskola distánsia (ne’ebé ikus mai koñesidu ho Eskola ba Uma). Hafoin prepara durante tempu badak nia laran, ezatamente iha loron 3 fulan abril tinan 2020 liu hosi aprezentasaun epizodiu 1 ba alunu sira 1o siklu nian.

To’o ohin loron, MEJD implementa ona Eskola ba Uma ba epizodiu 24 ba 25 ona ba grau ensinu sira iha Timor-Leste laran. MEJD serbisu hamutuk ho kanál televizaun sira iha Timor-Leste hanesan TVTL, GMNTV no TVE no mós estasaun rádiu sira iha Timor-Leste inklui partilla liu hosi pájina MEJD nian iha facebook.

Maneira ne’ebé MEJD uza daudaun ne’e mak komunikasaun unidirisionál, katak MEJD liu hosi ekipa Eskola ba Uma nian aprezenta de’it matéria (ou manda pájina sira livru nian ba alunu sira atu estuda outónomu ne’ebé akontese ba alunu sira Ensinu Sekundáriu nian) no la iha interasaun hosi alunu sira (karik sira la komprende konteúdu ruma, sira labele halo pergunta). Maibé, ha’u fiar mós katak ekipa Eskola ba Uma sei buka meius hotu-hotu atu bele hadi’a sistema aprezentasaun Eskola ba Uma nian (bele liu hosi video call ka skype ka aplikasaun adekuadu seluk ne’ebé utiliza ba eskola distánsia nian).

Ha’u konsiente katak kuandu hahú foufoun ne’e sempre iha problema no defeitu oin-oin no fiar katak ba oin programa ida ne’e sei kontinua mellora hodi bele oferese alternativa sira ba alunu sira, nune’e sira bele aproveita tempu Estadu Emerjénsia nian ne’e atu estuda netik iha uma. Aleinde ne’e, iha situasaun sira hanesan ne’e, adultu sira (liu-liu) inan-aman sira-nia prezensa, asisténsia no akompañamentu nesesita no esensiál tebe-tebes. Tantu alunu sira iha Ensinu Báziku (1o-3o Siklu) komu Ensinu Sekundáriu sira presiza tebtebes adultu no inan-aman sira atu akompaña no orienta sira hodi sira bele partisipa didi’ak iha atividade sira (bele mós rezolve sira-nia dúvida karik entende hela konteúdu ruma).

Iha situasaun Estadu Emerjénsia ida ne’e, alunu sira labele ona halo enkontru no interasaun direta ho nia manorin sira iha eskola, maibé sira kontinua iha interasaun ho sira-nia inan-aman iha uma. Situasaun ida ne’e halo inan-aman sira ezerse liu tan sira-nia papel no responsabilidade nu’udar edukadór no orientadór iha uma.

Ba ida ne’e, matenek na’in Oemar Hamalik (2015) deskreve papel inan-aman nian iha implementasaun ba eskola distánsia hanesan tuir mai ne’e:

  1. Inan-aman hola papel hanesan manorin númeru um iha uma. Katak, molok alunu sira tama iha mundu edukasaun formál, inan-aman sira mak sai manorin prinsipál dezde alunu sira sei ki’ik. Iha aspetu ida ne’e, inan-aman sira hola papel hodi kontrola tempu no maneira estuda hosi sira nia oan sira.
  2. Inan-aman sira hola papel nu’udar fasilitadór. Katak, inan-aman sira hola papel atu aranja no fasilita materiál no fasilidade ruma ne’ebé oan sira presiza ba sira-nia estudu distánsia nian.
  3. Inan-aman sira nu’udar motivadór. Katak, motiva oan sira atu estuda no bainhira oan sira enfrenta difikuldade ruma mak inan-aman sira presiza fó tulun liuhosi fó inspirasaun ba nia oan sira. Inan-aman sira mós bele sai mákina arankadór ba nia oan sira atu hasa’e labarik sira-nia motivasaun ba estuda mesak.
  4. Ikus liu, inan-aman sira hola papel nu’udar orientadór ka director. Katak, inan-aman sira sempre iha responsabilidade atu orienta no akonsella nia oan sira atu atinje metas hosi sira-nia estudu iha futuru. Inan-aman mós iha devér atu atu orienta nia oan sira ba tuir abilidade no skill ne’ebé nia oan sira iha.

Hein katak, ho implementasaun Eskola ba Uma (eskola distánsia) hosi MEJD, bele motiva liu tan alunu sira iha territóriu laran tomak atu aproveita estuda iha uma, nune’e imi lalakon imi-nia tempu ho buat sira la importante. Loos duni katak sei iha alunu barak tebe-tebes ne’ebé labele asesu ba programa “Eskola Ba Uma” ida ne’e tanba la iha enerjia eletrisidade, la asesu liña internet, la iha televizaun, rádiu no telemóvel android iha uma.

Maibé ba oin, MEJD bele halo estudu ida di’ak liu tan hodi bele hatene maneira oinsá mak alunu sira be hetan difikuldade sira iha leten ne’e bele hola parte mós iha atividade hotu-hotu iha programa ESKOLA BA UMA. Ita hatene katak iha difikuldade maibé importante liu mak ita tenke koko atu implementa nune’e, ita bele hatoman ita nia estudante sira hodi la depende ba manorin sira iha sira-nia estudu loro-loron.

Ikus liu, ha’u dezafia alunu sira atu partisipa ativa iha programa “Eskola Ba Uma” no dezafia mós inan-aman sira atu kontinua akompaña Ita-Boot sira-nia oan sira-nia estudu iha uma. Ba ajente edukadór sira hotu, husu mós atu tulun MEJD hodi halo susesu programa “Eskola Ba Uma” tuir kapasidade no rekursu ne’ebé Ita-Boot sira iha. Saudasoens edukativus no obrigadu barak!

*) Hakerek Na’in Profesór Eskola Sekundária Públika Olocassa Ossú (Viqueque) no Eskritór Livru “Misaun Ossú: Hanoin Tinan 75 Nia Ezisténsia iha Reinu Ossú-Ossoroa (2012)”.

HAKEREK NO HATÁN

Please enter your comment!
Please enter your name here