Ilustrasaun Traballadór. Imajen/Espesiál

DILI, 22 abríl 2020 (TATOLI) – Iha períodu Estadu Emerjénsia ne’e, Governu iha ona planu atu fó subsídiu ba traballadór hamutuk 30.000 iha rai-laran.

Inisiativa ne’e tama iha pakote sosio-ekonómiku sira durante Estadu Emerjénsia ligadu ho prevensaun ba surtu COVID-19, ne’ebé foin lalais Governu liuhosi Konsellu Ministru aprova ona.

“Atu fó subsídiu saláriu ba traballadór sira ho númeru pur volta 30.000, atu nune’e sira bele mantein nafatin sira-nia servisu. Ida-ne’e aprovadu tiha ona ninia medida ba implementasaun iha Konsellu Ministru”, informa Ministru Koordenadór Asuntu Ekonómiku interinu, Fidelis Manuel Leite Magalhães iha ninia knaar fatin, Palásiu Governu, kuarta ne’e.

Notísia Relevante: Governu Aprova Planu Sosio-Ekonómiku Hatan ba Efeitu Negativu Pandemia COVID-19

Ministru Fidelis hatutan, subsídiu salariál ba traballadór katak empreza sei selu porsentu 40 no Governu sei selu porsentu 60, maibé atu hetan ida-ne’e, traballadór sira tenke hola parte iha seguransa sosiál.

“Empreza sira labele demite ka hasai sira-nia traballadór durante Estadu Emerjénsia”, nia adianta.

Atuál Ministru Reforma Lejizlativa no Asuntu Parlamentár ne’e subliña tan, medida ne’e mós sei aplika ba taxista no kondutór sira seluk.

“Atu dehan mós katak iha pakote sosio-ekonómiku mós inklui ona medida ba ita-nia maluk sira ne’ebé sai vítima liu durante ne’e, hanesan motorista, taxista sira, kondutór sira ne’ebé Governu verifika hela dadus sira ne’e, maibé sira mós sei sai alvu importante ida husi prosesu ne’e”, nia salienta.

Governante ne’e adianta tan, Governu sei halo mós inzensaun katak halakon pagamentu ba kontribuisaun ba seguransa sosiál husi parte traballadór nian ne’ebé durante ne’e traballadór kontribui ona porsentu 40 no empreza porsentu 60 durante períodu Estadu Emerjénsia.

“Governu sei halo izensaun katak sei perdua tiha pagamentu ba kontribuisaun ba seguransa sosiál husi parte traballadór nian, durante períodu Estadu Emerjénsia. Governu sei la kobra, ne’ebé traballadór sira sei hetan saláriu kompletu tanba Governu la ko’a, ida ne’e ninia medida ba implementasaun aprovadu hotu iha Konsellu Ministru”, katak Fidelis.

Jornalista: Antónia Gusmão

Editora: Julia Chatarina

1 KOMENTÁRIU

  1. Planu deit ba…too ami hamlaha mate mak imi foin realiza…EE tama segundu ronde ona…mos osan sidauk bele realiza.karik hein too EE terseiru ronde karik……..#TimorMakHauHadomi@@@

HAKEREK NO HATÁN

Please enter your comment!
Please enter your name here