Ministru Koordenadór Asuntu Ekónomiku interinu no atuál Ministru Reforma Lejizlativa no Asuntu Parlamentár, Fidelis Manuel Leite Mangalhães. Imajen Tatoli/Egas Cristovão

DILI, 22 abríl 2020 (TATOLI) – Hafoin Governu sira liuhosi reuniaun Konsellu Ministru aprova pakote sosio-ekonómiku sira durante Estadu Emerjénsia ligadu ho prevensaun ba surtu COVID-19, mak iha pakote ne’e inklui mós medida hodi fó subsídiu pre-pagu eletrisidade ba kliente Eletricidade de Timor-Leste (EDTL) durante fulan-tolu tan.

“Iha pakote sosio-ekonómiku ne’ebé hetan ona aprovasaun husi Konsellu Ministru ne’e mós iha komponente ida hanaran servisu esensiál maka hanesan, sei kontinua nafatin fó pulsa eletrisidade ho montante $15 ba kada kliente, ne’ebé mak EDTL sei kontinua fó to’o fulan-tolu”, relata Ministru Koordenador Asuntu Ekonómiku interinu, Fidelis Manuel Leite Magalhães iha ninia knaar fatin, Palásiu Governu, kuarta ne’e.

Notísia Relevante: MOP Deside Fó Subsídiu Pre-pagu Eletrisidade $15 ba Kada Kliente Hamutuk 160.555

Kliente EDTL Apresia no Agradese ba MOP

Aleinde ne’e, Governu mós sei fó subsídiu ba bee durante fulan-tolu.

Objetivu Governu fó subsídiu ne’e, atu komunidade bele nafatin kumpre medida prevensaun COVID-19 nian hanesan distansiamentu sosiál, distansiamentu fíziku, uza máskra, fase liman ho bee no sasaun bebeik.

Polítika Governu fó subsidíu ne’e ho baze ba Dekretu Governu ba medida ezekusaun Estadu Emerjénsia iha ártigu 26, atu prevene konsumidór sira ka populasaun sira atu labele halo movimentu no halibur malu iha fatin ida hodi hola pre-pagu eletrisidade atu prevene-an husi COVID-19.

Kona-ba bee-moos, sei fó subsídiu ba kliente ne’ebé iha ona kontadór ka liga ona ho Sistema Diresaun Jerál Água no Saneamentu (DGAS, sigla portugés).

Antes ne’e, Ministériu Obra Públika (MOP) fó ona subsídiu ba kliente EDTL, tuir despaisu MOP númeru Ref. 581/MOP/III/2020, no intensaun subsídiu naun-finanseira ne’e ba kliente 160.555 atu hamenus movimentasaun kliente konsentra iha fatin hola pulsa atu kontribui ba salva saúde povu no prevensaun kontajia COVID-19 aliña ho objetivu Estadu Emerjénsia.

Nune’e, Ministériu Obra Públika (MOP) asina ona nota entendimentu ho Operadór Timor Telecom, Telemor no Telkomcel atu fasilita subsídiu eletrisidade ho $15 ba kliente hamutuk 160.555 liuhosi manda mensajen ba númeru únika ka hotline 12150.

Operadór telekomunikasaun tolu kontinua manda token ba kliente sira husi loron 05 abríl to’o loron 26 abríl 2020.

Jornalista: Antónia Gusmão

Editora: Julia Chatarina

8 KOMENTÁRIU

  1. Ar garganta bot liu. Nusa la iha medidas ida ek diak atu hare povu dia necessariu lorloron. Povu pasiensia tbes ona e tanis tamba hamlaha durante fulan ida ona. Maibe governo laiha medidas ke diak. Orsamentu sumba tun sumb sae. Pois agra dadaun atu prolonga tan stadu emergensia, imi hanoin diak ba imi deit ne.. Sa tan Parlamentu mos hakarak aproveita orasamntu balun ba operasional parlamentar, maibe sr. Presidente la iha konsiensia ida, nia lahtne katak orasmnt nb sira aprova ne aloka ba surtu covid, quer dizee necessidade povu mos prioridade, laos sistema parlamentr

  2. Estadu de Emerjensia ne mak Prolonga tan ba fulan 6 karik, Estadu no Governu mos sei fahe nafatin Pulsa Eletrisidade Povu karik.

  3. Karik bele governo hare ba iha necessidade basico povo nian Tamba iha media Ita boot Sira akompaina katak iha populasaun barak MK oras ne halerik dadauk ona katak Sira laiha Osan atu atende Sira Nia necessidade tmba ne Sira bele terus ba hamlaha no imunidade bainhra Corona Ataka Sira bele hasoru situasaun nbe Grace tmba imunidade ladiak

  4. Se EE ne’e mak prolonga tan povu mate ho
    1. Eletrisidade ka?
    2. Covid 19 ka?
    3. Hamlaha ka?
    Sr ministru tetu took…..labele hanoin deit interese ba privadu hodi politiza promesas barak hodi publika sai atu nune taka falta!

  5. Tuir hw nia observasaun katak sebele governu trata nesesidade basika ba povu kibit laek sira hodi nune sira bele augenta durante estadu emergensia nb mak at estende tan. Tamba povu kibit laek rona tia noticia husi sr ministru MRLAP dhn kada uma kain hetan subsidiu kada uma kain 100 dollar ent povu hotu2 preokupa halai ba mai hodi trata dokumentus esensial sira ne mb to ikus la iha serteja tan ne husu ba governu se bele trata ba nesecidade basica ba hodi nune nia povu sira labele mate ba aihan. Dadus agricola iha ona nusa governu krk iha ona ent escuta tuir dadus nebe mak foin dadauk sensus agricola rekolaha ona no kada uma ida iha hela numeru de registu agricola. Mak ne dt hw nia sujestaun.

  6. Ami kiik.no kiak ne hein deit…atu fo nk pulsa listrik k pulsa TT . TELEMOR AMI SIMU DEIT… tamba agora dadaun ami labele sai ba serbisu, tamba tauk moras C19….ami persiza liu mak hahan…ami aileba persiza estadu nia tulun…

  7. populasaun han no hemu mk eletrisidade ho be neee,,,,tau prioridade uluk lai ba SEMBAKO krk ,,, Hau apoiu,,,,subsidiu eletrisidad3 ho be ms n ema nebe asesu n mk hetan benefisiu,,,oinsa ho populasaun nebe hla iha area de motas la asesu be mos ho eletrisidade nee…?

  8. Moras iha nasaun laran laiha ona mz hkrk estende tan EE hlo saida importante mk taka fonteira ho airoprtu metin dt atu nune fo fali tempu ba povu hdi buka moris. Tmb povu moz baruk rona imi nx promete bosok sira ne ona .. imi mk promete maibe imi mk ingkar sorte nasaun ida ne iha ema nbe laran dk hdi tulun malu mk laiha ema mate ba hamlaha mos iha ona.

HAKEREK NO HATÁN

Please enter your comment!
Please enter your name here