Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu, kuarta (19/02). Imajen Tatoli/Egas Cristovão

DILI, 22 abríl 2020 (TATOLI) – Ezekutivu sira liuhosi reuniaun Konsellu Ministru (KM) aprova projetu Dekretu-Lei ne’ebé aprezenta husi Ministra Solidariedade Sosiál no Inkluzaun, Armanda Berta dos Santos, kona-ba medida apoia ba empregu iha ámbitu pandemia COVID-19 iha Timor-Leste.

Diploma ida ne’e hodi evita dezempregu, hamenus impaktu rendimentu ba traballadór no apoia viabilizasaun ba empreza.

“Dekretu-Lei ne’e sei fó subsídiu estraordináriu ida bainhira iha kazu suspensaun ba kontratu traballu ka husi redusaun ba oráriu servisu nian, ho montante ne’ebé ekivalente ho porsentu 60 husi remunerasaun no sei suspense devér ba pagamentu husi kontribuisaun sosiál”, relata nota ofisiál ezekutivu ne’ebé Agênsia Tatoli hafoin reuniaun ezekutivu iha Salaun Ministériu Finansa, Aitarak-Laran, kuarta ne’e.

Nota ne’e haktuir, apoiu ida ne’e depende ba verifikasaun kumulativa husi kondisaun elejibilidade sira ne’ebé haktuir ona iha prezente Dekretu-Lei, mak hanesan obrigatoriedade no suspensaun kontratu traballu ka redusaun períodu normál traballu nian, kauza husi pandemia COVID-19 no tuir Lei Traballu no obrigatoriedade ba empregadór sira no trabalhadór sira ne’ebé mak rejista ona iha rejime kontributivu seguransa sosiál.

Nune’e, sei abranje mós traballadór no entidade empregadór sira ne’ebé mak rejista iha rejime kontributivu seguransa sosiál iha prazu loron sanulu, hahú konta publikasaun husi Diploma Ministeriál ne’ebé sei regula prosedimentu husi inskrisaun estraordinária nian.

Jornalista: Antónia Gusmão

Editora: Julia Chatarina

1 KOMENTÁRIU

  1. Karik foin mak Kata Pembuka(Alias Wacana)
    Persija nia procedimento “Legais e Detailho” ;Liga ho kontiudo hosi nutiçia atual.
    Parabens ba Esforço Governo.

HAKEREK NO HATÁN

Please enter your comment!
Please enter your name here