Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão

DILI, 22 abríl 2020 (TATOLI)-Governu liuhosi Ministériu Ensinu Superiór Siénsia no Kultura (MESSK) daudaun ne’e asesu ona lista estudante Timoroan la’ós bolseiru hamutuk ema na’in 283 maka durante ne’e estuda iha Filipina, Brazíl no Thailandia.

Enkuantu, dadus hosi Portugal no Indonézia sei iha prosesu verifikasaun ne’ebé hala’o hosi adidu edukasaun TL ho reprezentante Embaixada sira iha rai-li’ur.

Notísia Relevante :Governu Sei Atribui Subsídiu ba Estudante Timor-oan iha Estranjeiru

MESSK Longuinhos dos Santos, hateten adidu edukasaun ne’ebé destakadu iha nasaun tolu maka forñese dadus hirak ne’e.

Kona-ba Nasaun sira ne’ebé maka MESSK la destaka ninia adidu, Ministériu ne’e fó responsabilidade ne’e ba Embaixada sira maka halo verifikasaun hodi entrega ba Governu para hahú ona prosesu pagamentu subsidíu ba estudante la’ós bolseiru.

Notísia Relevante :Subsídiu ba Estudante Iha Estranjeiru Aplika de’it ba Naun Bolseiru

Governante dehan estudante bolseiru sira sei la simu subsídiu ne’e tanba kada fulan Governu aloka orsamentu bolsa estudu ba sira nia konta bankaria idaidak.

“Dadus husi nasaun tolu ne’e laiha problema tanba konfirmadu ona agora ita hein de’it mak dadus husi Portugal no Indonézia maski tama ona iha lista Ministériu nian maibé ita seidauk halo konfirmasaun,” dehan Governante ne’e ba Jornalista sira hafoin reuniaun Konsellu Minsitru kuarta ohin, iha edifísiu Ministériu Finansa.

Ministériu Ministériu Ensinu Superiór Siénsia no Kultura sei kontinua halo diskusaun ho Ministériu Negósiu Estranjeiru no Kooperasaun kona-ba montante orsamentu hirak maka sei prevee ba programa subsídiu ba estudante sira.

Jornalista : Tomé Amado

Editór     : Agapito dos Santos

HAKEREK NO HATÁN

Please enter your comment!
Please enter your name here