Primeiru-Ministru, Taur Matan Ruak, Prezide Reuniaun Konsellu Ministru Iha Palásiu Governu, Kuarta (18/03). Imajen/Egas Cristovão

DILI, 22 abríl 2020 (TATOLI) – Governu liuhosi reuniaun Konsellu Ministru (KM) aprova Projetu Dekretu-Lei kona-ba kriasaun suplementu remuneratóriu ba funsionáriu, ajente no traballadór Administrasaun Públika, ne’ebé hala’o ida-idak ninia atividade iha servisu ba prevensaun ba surtu COVID-19 iha Timor-Leste.

Proposta ne’e aprezenta husi Ministra Finansa ein ezersísiu, Sara Lobo Brites.

“Ministériu Finansa serbisu hamutuk ho Gabinete Primeiru-Ministru, aprezenta Dekretu-Lei ida atu atribui suplementu remuneratóriu ba funsionáriu, ajente no traballadór Administrasaun Públika ne’ebé presta sira ninia atividade durante vijénsia Estadu Emerjénsia, liuliu atividade sira ne’ebé relasiona ho prevensaun no kombate COVID-19”, informa Sara Lobo Brites hafoin reuniaun KM ne’ebé hala’o iha Salaun Ministériu Finansa, Aitarak-Laran, kuarta ne’e.

Maski proposta ne’e hetan ona aprovasaun, maibé iha Dekretu-Lei ne’e seidauk fixa montante hira mak sei atribui, maibé atu permite de’it Governu aprezenta liu fali regulamentu ruma hafoin bele atribui montante tuir risku ne’ebé traballadór sira hetan.

“Iha dokumentu ne’e hateten, sé mak iha risku aas liu hodi halo prevensaun ba COVID-19 maka Profesionál Saúde sira, Defeza, Seguransa no mós traballadór sira ne’ebé maka loron-loron halo limpeza ka raut lixu iha Dili laran no mós traballadór sira seluk, tanba sukat grau ba risku entaun iha Dekretu-Lei seidauk fixa ninia montante maibé Konsellu Ministru sei deside ninia regulamentu tuir risku ne’ebé mak atribui”, dehan atuál Vise-Ministra ne’e.

Entretantu, tanba proposta ne’e ho forma Dekretu-lei maka sei lori ba Prezidente Repúblika hodi promulga.

Bainhira promulga maka Ministériu Finansa hamutuk ho Gabinete Primeiru-Ministru halo fali proposta ida hodi aprezenta iha Konsellu Ministru hodi fiksa valór.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here