Eis Primeiru Ministru no atual Sekretariu Jeral Partidu Fretilin, Mari Alkatiri wainhira hasoru malu ho Primeiru Ministru Taur Matan Ruak iha Palacio Governu.Imajen/Media GPM

DILI, 22 abríl 2020 (TATOLI)—Sekretáriu Jerál FRETILIN, Marí Alkatiri hateten, Partidu Frente Revolucionária de Timor-Leste Independente  (FRETILIN) kontinua apoia VIII Governu Konstituisaun ne’ebé lidera hosi Primeiru-Ministru (PM), Taur Matan Ruak, to’o 2023.

Tuir nota esklaresimentu ne’ebé Agência TATOLI, asesu kuarta ne’e, FRETILIN apoia VIII Governu iha sentidu ida de’it katak atu garante Governu ne’e rasik no Primeiru Ministru, Taur Matan Ruak bele kontinua nia governasaun to’o nia mandatu ramata iha tinan 2023, ho estabilidade tomak no la fó dalan ba krize institusionál ho natureza saida de’it.

“Ami hakarak reitera katak FRETILIN nian apoiu ba VIII Governu ne’ebé lidera hosi Primeiru Ministru, Taur Matan Ruak, la akontese agora tanba moras COVID-19.  Karik problema COVID-19 laiha mós, tanba implozaun organizadu iha “AMP”, FRETILIN sei mai nafatin fó apoiu ba VIII Governu atu bele hakotu impase polítiku ne’ebé dura kleur demais ona,” Sekretáriu Jerál FRETILIN, Marí Alkatiri, afirma liuhosi nota esklaresimentu no klarifikasaun kona-ba pozisaun FRETILIN nian relasiona ho VIII Governu Konstitusionál .

Alkatiri dehan, apoia ida-ne’e bazeia ba nesesidade atu garante estabilidade governativa no governasaun nasaun nian to’o 2023 nu’udar tempu atu hahú prosesu naruk ida hodi halo definisaun foun polítika ba rekonstrusaun ekonómika no sosiál. Rekonstrusaun ida-ne’e, tanba nia natureza rasik, sei lori tinan barak atu bele ramata ho susesu.

“Apoiu la’ós foin atu hahú. Hahú ona, ho faze dahuluk ne’ebé liuhosi Deputadu na’in-23 FRETILIN nian iha Parlamentu Nasional nia votu a-favór ba proposta sira hosi Governu, nu’udar prátika insidénsia parlamentár ne’ebé úniku no nunka akontese antes,” komunikadu imprensa ne’e haktuir.

Iha komunikaddu ne’e, Sekretáriu Jerál FRETILIN hateten, FRETILIN apoia VIII Governu hodi kontra tentativa balun atu harii situasaun hapara vida institusionál no nu’udar atuasaun ne’ebé buka atu halo krize institusionál foun ne’ebé la haree ba interese nasaun no povu nian.

Apoia ida-ne’e moris hosi lideransa FRETILIN nia reflesaun kle’an, ne’ebé ikus traduz iha IV Konferénsia Nasionál FRETILIN nian, ne’ebé hala’o iha loron 14 fulan-marsu liu ba ho tema “Aprofundar a Aliança com o Povo para a Construção e a Unidade da Nação” ka “Hakle’an Aliansa ho Povu ba Konstrusaun no Unidadi Nasaun nian”.

“Ita tenki buka atu reforsa lejitimidade Governu ne’ebé ativu nian hodi bele permite katak sei laiha interupsaun ka hakotu forsadu ba estabilidade governativa. Tanba ida-ne’e sei bele loke dalan ba alternánsia ne’ebé la normál no ita lakohi atu sai nu’udar prátika polítika iha nasaun ne’ebé sistema sofre hela krize identidade ne’ebé provoka tendénsia atu hamoris, hametin podér informál kontra podér formal,” Alkatiri hateten liuhosi komunikadu ne’e.

Iha komunikadu ne’e haktuir, atu konsistente no koerente ho hanoin iha loron 21 fulan-marsu, FRETILIN no PLP hahú prosesu no harii Plataforma Entendimentu. FRETILIN halo parte ba ida-ne’e ho kna’ar nu’udar partidu boot liu iha Timor-Leste, ho lejitimidade ne’ebé hosi votu povu iha eleisaun 2018. Nune’e mós PLP halo parte ho knaar nu’udar Partidu hosi Primeiru Ministru VIII Governu Konstitusional nian.

Nune’e, liu husi nota entendimentu ida-ne’e, klaru ona katak apoiu FRETILIN nian mai ho objetivu polítiku ida atu reforsa lejitimidade VIII Governu Konstitusionál nian no atu garante estabilidade governativa to’o tinan 2023, no la’ós atu harii “Aliansa” parlamentár atu bele forma Governu ida foun.

FRETILIN ho nia lejitimidade mai atu haboot no hametin lejitimidade VIII Governu atu hametin estabilidade governativa no ajuda hahú prosesu atu  hakotu impase polítiku no loke dalan atu kurije prátika ne’ebé diskrimina malu la inkluzivu no hahú vida no kultura institusionál foun iha Repúblika Demokrátika Timor-Leste.

Notísia Relavante: FRETILIN Sei Asegura PM Taur Matan Ruak To’o 2023

Jornalista : Evaristo Soares Martins

Editór      : Cancio Ximenes

1 KOMENTÁRIU

  1. Parabens ba Grande Camarada DR. Mari Alkatiri nb hatoo ba publiku liu hs nota esklarecimento konaba apoio VIII GC nb lidera hs General TMR too nia rohan 2023, a luta continua

HAKEREK NO HATÁN

Please enter your comment!
Please enter your name here