Ilustrasaun Informasaun hoax nebe lansa iha Facebook relasiona ho COVID-19. Imajen/Espesiál

DILI, 22 abríl 2020 (TATOLI) – Sekretáriu Estadu Komunikasaun Sosiál, Merício Juvinal dos Reis ‘Akara’, hateten kuandu iha tan estensaun Estadu Emerjénsia ba loron 30 tan, Governu liuhosi Sekretaria Estadu Komunikasaun Sosiál (SEKOMS) sei aumenta tan medida prevensaun balun ne’ebé atu haree ba kontrola prevensaun informasaun falsa ka hoax sira ne’ebé lansa iha rede sosiál, Facebook relasiona ho COVID-19. 

“Kuandu Estadu Emerjénsia estende, ita iha kompeténsia atu halo dekretu kona-ba medida balun, ne’ebé sei haree internál hanesan liga direita ba ema ne’ebé maka lansa informasaun ka promove hoax, ami sei haree ema ne’ebé maka la kontribui kombate COVID-19, maibé halo fali pániku ka lansa fali informasaun hoax. Iha Dekretu Governu, ita haree pontu balun oinsá ita kombate no minimiza ida ne’e”, dehan Sekratáriu Estadu Akara hafoin ramata enkontru ho parte kompetente sira ba prevensaun kombate hoax  iha rede sosiál iha Palásiu Governu, kuarta ne’e.

Nia dehan, SEKOMS husu ona ba parte TIC Timor, ne’ebé maka kria ona website COVID-19 atu hahú haree oinsá maka bele tau no haree ba informasaun COVID-19 ne’ebé kredível no ida ne’ebé maka kategoria hoax, bele blokeia atu labele iha informsaun ne’ebé pániku iha sosiadade iha situasaun emerjénsia nia relasiona ho COVID-19.

Governante ne’e reforsa, Governu mós husu ba Autoridade Nasionál Komunikasun (ANC, sigla portugés) no operadór telekomunikasaun sira hodi promove informasaun ne’ebé di’ak no  labele husi informasaun falsu ka hoax maka domina públiku.

SEKOMS sei koopera nafatin ho Sentru Mídia COVID-19 nian hodi haree informasaun ne’ebé falsa bele transmite ba públiku.

Akara apela ba mídia sira tenke kontribui fó informsaun ne’ebé akuradu no no kredível no labele halo pániku públiku iha situasaun krize.

Sorin seluk, Diretór Nasionál Polisia Sientífika Investigasaun Kriminál (PCIC, sigla portugés), Vicente Fernandes Brito, dehan bainhira Governu no Estadu deside halo prolongamentu ba Estadu Emerjénsia maka parte telekomunkikasaun no komunikasaun presiza hadi’a buat balun .

“Sujestaun sira ne’e ami koloka ona ba Sekretáriu Estadu Komunikasaun Sosiál no diskusaun ida ne’e nu’udar pontu partida ida no inísiu ida ne’ebé di’ak no sei kontinua ba diskusaun sira tuir mai”, nia akresenta.

Tuir Vicente, PCIC prontu kuandu Governu tau dekretu ba medida prevensaun kombate hoax.

“Ita tenke prontu ho ita nian rekursu ne’ebé maka iha, tenke uza ho másimu maibé PCIC mesak labele, laiha kombate krime ida ita dehan kompleksu. La’ós órgaun ida de’it maibé ita presiza kooperasaun no koordenasaun mútua entre institusaun relevante hanesan TIC Timor, ANC no autoridade polisiál sira seluk tan. Ita hamutuk maka bele halo buat ruma ba ita nia país ida ne’e“, nia subliña.

Iha loron 27 marsu, Prezidente Repúblika deklara Estadu Emerjénsia hafoin Parlamentu Nasionál a-favór ho unanimidade hodi fó autorizasaun ba Xefe Estadu dekreta, nune’e bele halo distansiamentu sosiál, ne’ebé nu’udar meiu ida halo prevensaun ba COVID-19.

Estadu Emerjénsia entre ein vigór iha loron 28 marsu, hahú oras 00:00 to’o 26 abríl 2020, oras 23:59.

Tuir planu, Estadu sei estende tan Estadu Emerjénsia ba loron 30 tan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here