Filomeno Fernandes.

DILI, 22 abríl 2020 (TATOLI)-Mate maka dalan ikus ne’ebé ema kriatura ida tenki hasoru iha ninia viajén moris, no iha doutrina sarani katolika katak hosi mate isin nian iha mundu maka bele hetan moris klamar nian ida rohan la’ek iha lalehan, situasaun ne’e akontese ba Eis Futebolista, Filemeno Pedro Cabral Fernandes ‘Manu-Meno’, iha tersa (21/04/2020) hakotu ona iis iha Ospitál Nasionál Guido Valadares (HNGV-sigla portugés).

Isin-Mate hosi Matebian Filomeno Fernandes daudaun ne’e rai iha ninia rezidensia Suku Mascarenhas Dili, no tuir planu sei halo’ot iha Semitériu Públiku Bekuse Dili, kuarta (22/04/2020) tuku 15:00 otl.

Durante sei moris matebian fó dedikasaun boot ba dezenvolvimentu desportu iha Timor-Leste tanba nia hanesan jogadór famozu ida.

Alende ne’e, assume mós responsanbilidade nu’udar treniadór, Membru ezekutivu Federasaun Futeból Timor-Leste (FFTL), Membru Fundadór Klube SLB Laulara, Membru Fundadór Liga Futeból Amadora (LFA).

Tuir Família Matebian, Tomas Cabral informa matebian sofre moras komplikadu durante fulan haat ka lima ba kotuk. Maski nune’e nia dehan família rasik la deskobre matebian ne’e moras tanba iha kondisaun saúde ida di’ak no la hutudu liuhosi sintoma ruma.

“Ema ne’e di’ak hela, nia moras duni ema ne’e kal rai hela nia moras iha fulan haat ka lima ba kotuk pois ami tenta hela nia rasik hola tia billete atu ba halo tratamentu iha Bali maibé akontesimentu COVID-19 nia nain rasik mak kansela tiha,”dehan nia ba Jornalista sira iha Mascarenhas Dili, kuarta ohin.

Maski planu tratamentu saúde iha rai-li’ur kansela, maibé família kontinua esforsu hodi konvida doutór espesialista balun hodi fó tratamentu saúde ba matebian iha ninia uma durante implementasaun estadu emerjénsia.

Entretantu, matebian Filomeno Fernandes husik hela ninia kaben ho oan na’in neen, feto lima no mane na’in ida.

Perfíl

Filomeno Pedro Cabral Fernandes, moris iha Munisípiu Dili iha tinan 65 liubá. Durante ukun Portugal nian futebolista Timoroan ne’e hahú joga iha klube Benfica Dili.

Iha kolonialismu Portugés, matebian mós hetan dadur hamutuk ho Saudoso Joaquin dos Reis Fernandes, Inácio Fernandes hosi tinan 1975 to’o 1977 hanesan prijoneiru Polítika FRETILIN nian ne’ebé refujia husi Dili, Taibesi, Aileu, Maubise, Manufahi, Viqueque no ikusliu iha Laisorulai Keilikai iha tinan 1977.

Hafoin okupasaun Indonézia, Filomeno Pedro Cabral Fernandes servisu iha Dinas Penerangan Propinsi Timor-Timur no kontinua nudar futubolista iha klubu sira iha Dili.

No iha tinan 1980 ba leten, sai liurai iha suku uma kaduak durante tinan 10 no ikus mai sai membru Dewan Perwakilan Rakyat Daerah (DPRD), iha Manatuto.

Iha tinan 1980, matebian hahú involve an iha rede klandestina hodi fó apoiu ba prosesu libertasaun nasionál.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here