Ilustrasaun hoax ka informasaun falsu relasiona ho COVID-19. Imajen/Espesiál

DILI, 22 abríl 2020 (TATOLI) – Diretór Nasionál Polísia Sientífika Investigasaun Kriminál (PCIC, sigla portugés), Vicente Fernandes Brito, afirma durante períodu Estadu Emerjénsia parte PCIC rejista kazu hoax hamutuk 25.

Kazu ne’ebé rejista maioria maihusi informasaun hoax ka informasaun falsa kona-ba COVID-19 nian, ne’ebé lansa iha rede sosiál, Facebook.

“Ha’u hanoin durante vijénsia iha Estadu Emerjénsia, ita pur inisiativa, pur denúnsia informasaun sira rejista 25 kontiúdu ne’ebé maka lansa. Maioria ne’e maihusi ema nian post kona-ba informasaun COVID-19”, tenik Dirijente ne’e hafoin ramata enkotru ho SEKOMS no parte kompetente sira iha Palásiu Governu, kuarta ne’e.

PCIC ninia atuasaun hanesan administrativu polisiál, signifika katak PCIC iha nia servisu ida hanesan prevensaun.

“Hafoin identifika prosesu triajen, ita notifika ema se konsege identifika ne’e administrasaun polisiál. Maibé kuandu kontiúdu ne’e iha ninia tendénsia hanesan matéria krime, entaun ami partisipa lori ba Ministeriu Públiku. Kuandu nia la’ós hanesan krime ita tenke haree ninia kontiúdu ne’e krime ka lae. Karik lae entaun ami aguarda hanesan rejistu de’it no akompaña automatikamente iha ninia postingan sira ne’e”, Vicente esplika.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here