Portavós CIGC, Odete da Silva Viegas. Imajen Tatoli/Egas Cristovão

DILI, 22 Abríl 2020 (TATOLI) – Situasaun nasionál kazu Coronavirus ka COVID-19 ne’ebé fó sai hosi Sala Situasaun Sentru Integradu Jestaun Krize (CIGC, sigla portugés) ba kuarta  ohin (22/04/2020), hatudu katak, Timor-Leste mantein kazu konfirmadu 23.

Notísia Relevante : Pasiente COVID-19 Kontinua Aumenta ba Ema 23

Liuhosi konferénsia imprensa iha Sentru Mídia Sala Situasaun CIGC iha Sentru Konvensaun Dili (CCD), portavós CIGC, Odete da Silva Viegas, relata   mós katak,  suspeitu COVID-19 iha na’in-370, hein rezultadu na’in-47, provavel na’in-haat (4), kazu foun laiha (0), pozitivu na’in-22, negativu na’in-296 no rekupera na’in-ida (1).

Relatóriu ofisiál  CIGC nian ne’e mós hato’o katak, abitante ne’ebé sei kumpre hela konfinamentu obrigatóriu ka kuarentena hamutuk na’in-492, kompostu hosi na’in-414 iha Dili no na’in-78 iha munisípiu.

Iha mós abitante-sira ne’ebé kumpre auto kuarentena iha Dili zero (0) no iha munisípiu na’in-31. Seluk fali, CIGC mós relata katak, abitante-sira ne’ebé pasa ona kuarentena obrigatóriu durante loron-14 hamutuk na’in-1.548; iha Dili na’in-1.232 no munisípiu na’in-316.

“Númeru pozitivu no provavel nee mai hosi grupu neen (6) kompostu hosi  grupu Otél Lecidere, Otél Katuas, Otél Audian, Timing Otél, Otél Novo Horizonte ho Liquiça. Ema-sira pozitivu na’in-22 ho sira  ne’ebé provavel ne’e ita tau ketak-ketak ka la hamutuk,” afirma Odete da Silva Viegas.

Hosi sorin seluk, Odete da Silva Viegas  mós informa katak, kazu pozitivu ne’e inklui mós família ida (inan ho oan) iha Kuarentena Tasi-Tolu, maibé rezultadu teste hatudu inan mak pozitivu no lori ona ba izolamentu iha Vera Cruz no oan negativu iha hela Kuarentena Tasi-Tolu.

Notísia Relevante : CIGC Seidauk Deteta Kazu Transmisaun Lokál COVID-19 iha Liquiça

Kona-ba antesipasaun no identifikasaun ba surtu COVID-19 iha Munisípiu Liquiça tanba pasiente profesora Portugés ne’e kona iha Liquiça, Odete Viegas, relata katak, Ministériu Saúde ho CIGC fó ona orientasaun ba Diretór Saúde Munisípiu Liquiça atu halo screening ba ema hotu ne’ebé halo konsulta iha Liquica.

“Ita ko’alia lockdown ba Liquiça kuandu iha ona transmisaun komunidade ka transmisaun lokál iha Liquiça, tanba ne’e, ita orienta ba Detetór Saúde Liquiça atu halo screening ba ema hotu ne’ebé halo konsulta iha fasilidade  saúde iha Liquiça atu nune’e ita bele identifika propagasaun COVID-19 ne’e iha Liquiça,” hateten Odete Viegas hodi responde jornalista.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here