Portavós CIGC, Odete da Silva Viegas. Imajen/Antonio Goncalves

DILI, 22 Abríl 2020 (TATOLI) – Sentru Integradu Jestaun Krize (CIGC, sigla portugés) ho Ministériu Saúde (MS) fó ona orientasaun ba Diretór Saúde Munisípiu Liquiça atu  halo identifikasaun liuhosi Screening ba abitante sira ne’ebé halo konsulta iha fasilidade saúde iha Liquiça.

Notísia Relevante : COVID-19, TL Mantein Kazu Konfirmadu 23

Portavós CIGC, Odete da Silva Viegas, informa katak, prosesu Screening ne’e halo, tanba daudaun ne’e Liquiça rasik rejista grupu profesóra Portugés na’in rua maka pozitivu ba Coronavirus ka COVID-19 mezmu abitante na’in-lima (5) ne’ebé besik ka halo komunikasaun ho profesóra sira mós hetan ona teste rezultadu negativu.

“Iha parte Liquiça nian hanesan ita rona, iha profesóra na’in-rua iha ne’ebá, maibé ekipa vijilánsia epidemolojia halo nafatin serbisu atu hatene ema-sira ne’e karik iha kontaktu. Tersa (21/04/2020), ami fó orientasaun ba Diretór Saúde Munisípiu Liquiça halo Screening mós pasiente hotu- otu ne’ebé ba konsulta, karik iha moras inus-been, isin-manas atu bele foti amostra,” informa Odete da Silva Viegas, ohin, liuhosi konferénsia imprensa iha Sala Situasaun CIGC, Sentru Konvensaun Dili (CCD).

Prosesu Screening sei halo mós ba Munisipiu Bobonaro, Covalima inklui Oe-Cusse no munisípiu seluk tan. Maibé ba biba ne’e, Odete Viegas afirma tan, sei halo uluk ba Liquiça.

Hatán pergunta  jornalista nian kona-ba posibilidade halo lockdown iha Munisípiu Liquiça, Odete Viegas, esklarese katak, daudaun ne’e situasaun sei la’o normál hela, tanba ekipa médiku foti ona amostra ba abitante sira ne’ebé besik profesóra na’in  rua ne’e hatudu katak sira negativu.

Profesóra na’in rua ne’ebé sofre COVID-19 daudaun ne’e halo ona tratamentu saúde iha Sentru Izolamentu Vera Cruz Dili.

Nia apela ba komunidade-sira kontinua hakbesik-an ba sentru saúde sira hodi halo tratamentu ba saúde, tanba daudaun ne’e moras seluk hanesan, dengue mós atake makaas iha Timor-Leste.

“Moras seluk mós iha ita nia leet barak, husu nafatin ba povu hakbesik-an ba sentru saúde hodi halo atendimentu ba ita boot sira nia moras,” Odete Viegas hateten.

Governu liuhosi Ministériu Saúde no parseiru dezenvolvimentu kuaze 30-liu kontinua koloka ekipa hodi sosializa nafatin informasaun prevensaun COVID-19 ba komunidade-sira iha munisípiu hotu too área rurál.

Notísia Relevante : CIGC Seidauk Deteta Kazu Transmisaun Lokál COVID-19 iha Liquiça

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here