Sekretáriu Estadu Ambiente, Demétrio de Amaral de Carvalho koko fase liman iha fatin estasaun ne’ebé oferese husi Aliansa Solusaun Plástiku. Imajen/Mídia SEA.

DILI, 22 abríl 2020 (TATOLI) – Aliansa Solusaun Plástiku kompostu husi Kompañia Caltech Generál Contracting LDA, Heineken Timor-Leste, KOICA, Mercy Corps, USAID apoia Governu ba asaun prevesaun COVID-19, liuhosi fahe estasaun fase liman sira hamutuk 30 ne’ebé halo husi resiklajen lixu.

Hafoin simu diretamente estasaun refere husi Aliansa Solusaun plástiku, Sekretáriu Estadu Ambiente, Demétrio de Amaral de Carvalho, apresia ho inisiativa husi Aliansa sira tanba bele fó apoia nafatin Governu liuhosi asaun ida ne’e.

Governante ne’e dehan tan, parseiru sira halo komitmentu atu uza oportunidade ida-ne’e atu apoia Governu hodi luta hasoru COVID-19 no mós halo promosaun ba zero plástiku liuhosi estasaun fase liman ne’ebé halo husi plástiku resikladu.

“Ohin, Aliansa Solusaun Plástiku ne’ebé kompostu husi kompaña Caltech General Contracting LDA, Heineken Timor-Leste, Korean Internationál (KOICA), Mercy Corps, no USAID, hala’o asaun hodi suporta Governu ba asaun prevensaun COVID-19 liuhosi fahe estasaun fase liman sira hamutuk 30 ne’ebé halo husi plástiku ne’ebé resikla lokalmente iha Dili. Estasaun fase liman ne’e sei fahe ba fatin sira ho númeru tráfiku aas hanesan edífisiu Governu no Klínika sira,” refere nota impresa ne’ebé Agência Tatoli asesu liuhosi portál Sekretáriu Estadu Ambiente, kuarta ne’e.

Husi Suporta ida ne’e,  Eis Deputadu Partidu Libertasaun Populár (PLP) ne’e salienta katak iha posível atu resolve problema signifikante rua ne’ebé afeta ba umanidade, sosidade, ekonomia, lixu plástiku no COVID-19.

“Estasaun sira ne’e halo husi tizolu plástiku resikladu no sei fahe husi Sekretária Estadu Ambiente iha tempu badak nia laran”, nia akresenta.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here