DILI, 21 abril 2020 (TATOLI)–Ministru Defeza no Ministru Interiór Interinu, Filomeno Paixão de Jesus, husu ba autoridade postu administrativu, suku no aldeia iha área fronteira terrestre, atu kontribui hodi serbisu hamutuk ho Unidade Patrulamentu Fronteira (UPF) no FALINTIL Forsa Defeza Timor-Leste atu tau matan ba timoroan sira ne’ebé tama ilegál, tenke lori ba fatin kuarentena. 

“Husu ba maluk sira iha fronteira terrestre, liuliu ba administradór sira, xefe suku no xefe aldeia sira, kolabora maka’as halo patrollamentu hamutuk ho UPF no F-FDTL iha fronteira ne’ebá. Atu nune’e, ita-nia alin sira ne’ebé tama mai ne’e, la’ós ita bandu sira atu labele tama mai. Tanba bainhira ita bandu sira, ne’e la di’ak. Sira ne’e, ita-nia maun alin, ita tenke simu sira maibé lori sira tama iha kuarentena,” Filomeno Paixão de Jesus hato’o apelu ne’e hafoin enkontru ho Prezidente Repúblika Francisco Guterres “Lú Olo”, iha Palásiu Prezidensiál, Bairru Pité, Dili, tersa ne’e.

Nia hatutan, autoridade lokál sira tenke kolabora maka’as atu Kombate COVID-19 tanba moras ne’e kuandu mai la fihir ema, fihir uluk mak idade, neineik foinsa’e sira mós sei hetan hotu.

“Tanba ne’e maka, husu hotu-hotu atu kontribui ba seguransa fronteira terrestre iha Maliana, Mota Ain, Oe-Cusse, Suai-Salele, serbisu hamutuk ho seguransa no defeza sira atu kanaliza ema tama ilegál sira ne’e,” nia subliña.

Iha enkontru ne’e, Ministru Filomeno informa mós ba Prezidente Repúblika katak oras ne’e fronteira terrestre taka ona tanba ne’e dalaruma timoroan maluk ne’ebé tama ilegál ne’e seguransa sei kaer no lori hotu hodi entrega ba kuarentena.

Notísia Relevente: Governu Apresia Komunidade no Pesoál Seguransa iha Fronteira

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here