Sekretáriu Estadu Komunikasaun Sosiál, Merício Juvinal dos Reis Akara. Imajen Tatoli/Egas Cristovão

DILI, 21 abríl 2020 (TATOLI) – Governu liuhosi Sekretaria Estadu Komunikasaun Sosiál (SEKOMS) sei koopera ho Operadór Telekomunikasaun sira atu blokeia informasaun falsa sira bainhira kontribui pániku iha sosiedade.

Iha semana ne’e nia laran, SEKOMS hamutuk ho parte Autoridade Nasionál Komunikasaun (ANC, sigla portugés) inklui Operadór Telekomunikasaun Timor Telecom, Telkomcel no Telemor, sei diskute mekanizmu kontrolu ba publikasaun informasaun falsa sira iha rede sosiál.

Inisiativa ne’e nu’udar meiu ida kombate informasaun falsa ka hoax, ne’ebé sempre halo pániku iha komunidade nia le’et iha situasaun surtu COVID-19 iha Timor-Leste.

“SEKOMS sei husu ba operadór telekomunikasaun sira hodi blokeia informasaun falsa bainhira hamosu nível pániku ne’ebé aas  iha sosiadade”, dehan Sekretáriu Estadu Akara liuhosi konferénsia imprensa iha Palásiu Governu, tersa ne’e.

Sekretáriu Estadu Komunikasaun Sosiál, Merício Juvinal dos Reis ‘Akara’, observa durante ne’e individu balun sempre lansa informasaun falsa liuhosi meiu rede sosiál hodi hatauk komunidade iha situasaun COVID-19.

Tuir governante ne’e SEKOMS sei haree hamutuk ho autoridade kompetente sira atu kria baze legál hodi kombate hoax.

Nia kontinua apela ba mídia sira relasiona ho situasaun surtu COVID-19, hodi kontribui informasaun ne’ebé loos no kredível.

“Tenke verifika faktu antes públika notísia sira, Evita fó sai informasaun ne’ebé seidauk iha konfirmasaun ofisiál, halo balansu ba públikasaun sira, intensifika atualizasaun no públikasaun sira kona-ba surtu COVID-19, halo investigasaun no peskiza kle’an ba dadus kona-ba moras ne’e”, dehan Akara.

Sekretáriu Estadu ne’e apela ba públiku atu labele fiar ba informasaun falsu liga ho surtu COVID-19, husi fonte la’ós ofisiál hodi aumenta  situasaun sai pániku liu.

“Públiku tenke fiar ba informasaun liga ba dadus COVID-19, ne’ebé maihusi informasaun kredível husi instituisaun órgaun mídia ka mídia ofisiál sira, ne’ebé sai husi Sentru Integradu Jestaun Krize ne’ebé maka transmite ona husi kanál RTTL-EP, Agência Tatoli no inklui Portál COVID-19, Portál Ministériu Saúde no Portál SEKOMS”, nia subliña.

Nune’e mós Akara husu ba públiku atu fiar ba informasaun sira ne’ebé maihusi komunikadu kompletu ho data, dadus, asinatura inklui logo ofisiál Governu nian.

“Kuandu laiha buat sira ne’e labele fiar ba informasaun sira ne’ebé maka lansa iha rede sosiál. Lalika fiar informasaun falsa ne’ebé normalmente laiha fontes loloos hanesan laiha logu ofisíal institusaun nian no asinatura ofisiál sira. Labele fiar bazea ba dadus peskiza ruma ne’ebé mai ho opiniaun de’it, labele fiar ba informasaun anónimu sira, no labele fiar ba informasaun sira enkuantu informasaun ne’e la akuradu iha nia akotensimentu. Ikus liu labele fiar informasaun husi identidade falsa sira ne’ebé públika informasaun sira”, Akara adianta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here