Prezidente Tribunál Rekursu, Deolindo dos Santos. Imajen Tatoli/Egas Cristovão

DILI, 21 abríl 2020 (TATOLI)–Atu evita Virus Corona (COVID-19), labele da’et ba ema barak maka Tribunál sira hala’o servisu ho forma turnu. 

Prezidente Tribunál Rekursu (PTR), Deolindo dos Santos haktuir asuntu ne’e, hafoin enkontru mensál ho Prezidente Repúblika, Francisco Guterres “Lú Olo”, iha Palásiu Prezidensiál, Bairru Pité, Dili.

“Hato’o mós ba Prezidente Repúblika katak durante períodu Estadu Emerjénsia, Tribunál funsiona ho forma turnu, ne’ebé juíz sira servisu turnu, iha Dili loron ida ka loron ida bele iha juíz turnu rua ka tolu. Iha distritu sira seluk ne’e na’in ida-ida atu atende de’it ba prosesu sira urjente,” Deolindo esplika.

Nia hatutan, kona-ba juíz sira ne’ebé mak la turnu entaun sira hotu-hotu lori sira-nia prosesu ne’e ba iha uma no hala’o servisu iha uma. Bainhira iha nesesidade ruma mak bele ba Tribunál, maibé kuandu laiha nesesidade iha uma de’it.

“Ida-ne’e ho objetivu atu evita kontaktu direta ba malu. Aleinde ne’e, atu evita mós labele iha movimentasaun makaas ba prosesu. Hanesan baibain, Tribunál ninia servisu ne’e, maski prosesu no iha surat-tahan rihun ba rihun. Entaun, surat-tahan sira-ne’e pasa husi ema ida ba ema ida, ne’ebé pasa ba malu bá-mai. Mak, ho maneira ida-ne’e atu evita katak prosesu ne’e, ida-idak hela iha nia fatin, juíz sira lori prosesu sira ba hala’o servisu iha uma. Bainhira iha nesesidade karik, mak ba Tribunál tuur hamutuk atu ko’alia hodi foti desizaun,” nia dehan.

Tanba prosesu ne’e, tuir nia, ohin loron de’it pasa ba ema na’in-lima to’o na’in-sanulu, nune’e la hatene katak ema sira ne’ebé prosesu pasa ba ne’e, iha kondisaun ne’ebé saudável ka la’e. Ida-ne’e mak situasaun ne’ebé nia hato’o ba Prezidente Repúblika.

Maski PTR Deolindo labele fó dadus kompletu maibé atu dehan de’it katak iha tribunál sira-ne’e hotu sira atende de’it ba prosesu arguidu detidu, ho prosesu sumáriu ba interrogatóriu ho númeru ki’ik tebes.

Nia informa mós katak iha Tribunál Suai mak sei halo prosesu rua ka tolu husi prosesu kontinuasaun nian ho númeru limitadu tebes.

Maski Tribunál Rekursu rasik halo tiha ona deliberasaun ho forma ne’ebé mak reduzidu ona, se lae karik, ohin atu hato’o ba Prezidente Repúblika katak laiha ona prosesu akumuladu bainhira situasaun normál.

“Bainhira situasaun hanesan oras ne’e daudaun, deliberasaun husi ami mós, limitadu tebes. Tanba ne’e maka ami-nia kazu pendente ne’e ki’ik liu ona. Karik situasaun normál dalaruma prosesu sira-ne’e hotu ona. Julgamentu ne’e, kuandu ema barak mak partisipa ne’e perigu tebes. Tanba ne’e, baibain mínimu ema na’in-lima to’o sanulu de’it mak bele tama, tanba iha ne’ebá iha juíz, prokuradór, defensór, ofisiál justisa, família arguidu, sira ba hotu iha ne’ebá,” nia hateten.

Entaun, nia haktuir, se ema ida mak iha problema ona ho COVID-19, signifika bainhira halo kontaktu ho ema sira iha sala julgamentu, ikusmai bele fó perigu no bele kona. Kuandu nia kona ona, nia sai fali ba komunidade sei ba kontaktu ho ema oin-oin no sei espalla moras ne’e da’et ba beibeik.

Notísia Relevente: Durante EE Tribunál Konsidera De’it Julgamentu Ba Kazu Importante

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here