Imajen tatoli/António Goncalves

DILI, 21 abríl 2020 (TATOLI)—Parlamentu Nasionál (PN), tersa ne’e, aprova votu pezár ba Diretór Klínika Bairru Pité, saudozu Doutór Daniel Murphy ne’ebé fila hikas ona ba Aman Maromak Nia uman iha semana kotuk.

Proponente ba proposta votu pezár ne’e mai hosi Deputadu FRETILIN Aniceto Guterres, Deputadu CNRT Patrocínio Fernandes dos Reis, Deputadu Partidu Demokrátiku (PD) António da Conçeição, Deputadu Partidu Libertasaun Populár (PLP) Abel Pires da Silva no no Deputada KHUNTO Olinda Guterres.

Rezultadu Votasaun ba proposta votu pezár falesimentu ne’e a-favór 55, kontra 0 no abstensaun 0

Sesaun votu pezár ne’e dirije hosi Prezidente Parlamentu Nasionál Interinu atuál Vise-Prezidente Parlamentu Nasionál, Luis Roberto .

Xefe Bankada Parlamentár FRETILIN Aniceto Guterres, ne’ebé proponente ba proposta ne’e hato’o sentida kondolénsia kle’an ba família enlutada.

“Doutór Daniel, ita bele dehan médiku no ativista. Nia mai Timor serbisu permanente ba kestaun saúde dezde 1998, iha situasaun ne’ebé Timor presiza duni. Nia mai situasaun sertu ne’ebé timoroan presiza duni asisténsia saúde,” Aniceto Guterres, informa liuhosi plenária, Parlamentu Nasionál, tersa ne’e.

Aniceto afirma, Doutór Daniel merese hetan votu pezár hosi órgaun soberanu Parlamentu Nasionál.

“Ohin, sesaun plenária Parlamentu Nasionál, nia merese hetan votu pezár tanba sidadaun ne’ebé fó ona kontribuisaun ba povu Timor-Leste iha tempu defísil,” dehan Aniceto Guterres.

Entretantu, Xefe Bankada Partidu Demokrátiku (PD), Deputadu António da Conçeição rekoñese Doutór Daniel nia kontribuisaun iha área saúde ba povu Timor-Leste maka’as tebes.

“Nia mai (Timor-Leste) iha períodu ida krítiku liu tanba ne’e ita iha netik eroi ida hodi fó asisténsia saúde ba timoroan. Nia merese ita hotu ninia solidariedade. Nia la’os fakar raan iha Timor maibé ninia solidariedade ba Timor maka’as tebes,” nia hateten.

Iha parte seluk, Deputadu PLP, Abel Pires, hato’o sentida kondolénsia ba família matebian no husu ba oan ki’ak sira forsa nafatin.

“Doutór Daniel mai tempu ida-ne’ebé defísil tebes. Iha kotestu Doutór Daniel, vítima masakre barak mak halai ba Doutór Daniel tanba iha momentu ne’ebá timoroan sira ta’uk ba ospitál Governu nian. Ida-ne’e luta estraordinária ida,” dehan Deputadu PLP ne’e.

Aleinde ne’e, Deputada KHUNTO, Olinda Guterres, sai proponente ba proposta ida-ne’e tanba Doutór Daniel nia kontribuisaun iha Timor-Leste iha área saúde nian boot tebes no sura la hotu.

“Nia disponivel iha kualkér oras hodi fó atendimentu iha área saúde nian bai ta hotu. Tanba ne’e, merese parlamentu fó votu pezár ba Doutór Daniel,” nia dehan.

Notísia Relevente: Estadu Kondekora Doutór Daniel Murphy ho Medalla Órden TL

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here