Xefe Bankada Partidu Demokrátiku (PD), António da Conceição ‘Kalohan'. Imajen TATOLI/António Gonçalves

DILI, 21 abríl 2020 (TATOLI)—Bankada Partidu Demokrátiku (PD) propoin estabelese Konsellu Nasionál hodi envolve líder nasionál Kay Rala Xanana Gusmão, Marí Alkatiri no Ramos Horta apoia asaun VIII Governu nian iha ámbitu prevensaun no kombate Coronavirus (COVID-19) iha Timor-Leste.

“Envolvimentu líder nasionál sira hotu (Xanana, Alkatiri, Horta) nian hodi hola kna’ar lidera asaun sira-ne’ebé mak governu planeia atu fó konfiansa hikas ba povu no hamutuk kombate moras Coronavirus. Bankada PD apresia serbisu voluntáriu, dedikasaun no abnegasaun ne’ebé maun boot Kay Rala Xanana Gusmão halo, hodi mós tulun Governu iha nia asaun sira,” Xefe Bankada PD, António da Conçeição, propoin asuntu ne’e liuhosi deklarasaun polítika iha plenária Parlamentu Nasionál, tersa ne’e.

Xefe Bankada PD ne’e akresenta, iha biban ne’ebé Konsellu-Ministru tetu hela atu aprezenta ba Prezidente Repúblika no Parlamentu Nasionál kona-ba planu atu estende Estadu Emerjénsia, Bankada Demokrátiku hanoin katak Indispensável tebes Governu envolve lideransa nasaun nian ne’ebé hahú halo serbisu hamutuk fó hikas garantia ba ita-nia populasaun.

Haree ba propagasaun COVID-19 iha mundu, Timor-Leste mós la sees hosi situasaun ne’e, tanba ne’e Bankada PD hakarak fó proposta konkreta lima (5) hanesan tuir mai ne’e:

1. Primeiru-Ministru nu’udar xefe ezekutivu lidera Governu nia asaun tomak ba planu emerjénsia, planu ne’ebé atu lori nafatin normál funsionamentu Governu nian.

2. Primeiru-Ministru liuhosi Konsellu-Ministru hasai rezolusaun Governu nian ida atu estabelece Konsellu Nasionál hodi Kombate coronavirus no estabelesimentu planu Salvasaun Nasionál. Konsellu Nasionál ida-ne’e envolve líder nasionál sira hanesan Maun Boot Kay Rala Xanana Gusmão, Jose Ramos Horta no Mari Alkatiri.

3. Hosi kriasaun Konsellu Nasionál ida-ne’e, Primeiru-Ministru tau fiar ba Maun Boot Kay Rala Xanana Gusmão, koordena atividade kombate surtu coronavirus no serbisu asisténsia sosiál no mós atividade defeza no seguransa ligadu ba kombate surtu coronavirus no nia impaktu sosiál ekonómika.

4. Primeiru-Ministru liuhosi Konsellu-Ministru nomeia Jose Ramos Horta hodi halo kampaña Internasionál mobiiza apoia internasionál nian hodi tulun Timor-Leste halo asaun ba kombate coronavirus no mós medida seluk hodi tulun rekupera atividade ekonómika país nian ne’ebé hatodan ona setór privadu iha tinan tolu nia laran.

5. Primeiru-Ministru liuhosi Konsellu Ministru define kna’ar espesífiku ba Marí Alkatiri atu hola parte hamutuk halo planu médiu prazu ho prioridade espesífiku ba dezenvolvimentu país nian ba tinan rua ne’ebé sei resta nu’udar planu konjunta Konsellu Nasionál ba kombate surtu coronavirus no salvasaun nasionál.

“Proposta ida-ne’e Bankada Partidu Demokrátiku aprezenta hodi tulun Governu hala’o nia responsabilidade serbí nasaun no serbí povu. Nasaun presiza hakmatek no moris saudavel, moris di’ak no moris dignu, hasees interese grupu, tane-aas interese nasionál. Hanesan iha tempu funu Komandante sira husu atu povu rona lideransa sira, ha’u hanoin agora povu husu atu lideransa sira rona povu nia halerik,” dehan Xefe Bankada PD, António da Conçeição.

Xefe Bankada PD husu bankada sira seluk asina proposta ne’e hodi aprezenta ba Primeiru-Ministru, Taur Matan Ruak.

Deklarasaun Partidu Demokrátiku ne’e hetan autorizasaun hosi Prezidente PD, Mariano Assanami Sabino, Sekretáriu Jerál, António da Conçeição, Prezidente CPN, Adriano do Nascimento, Vise-Prezidente atuál deputada, Ernesto Fernandes “Dudu” no Prezidente PMD atuál Deputada Elvina Sousa Carvalho.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here