Portavóz Gabinete Sentru Integradu Jestaun Krize (CIGC), Sergio Lobo. Imajen/Egas Cristovao

DILI, 21 abríl 2020 (TATOLI)-Tuir dadus hosi Sala Situasaun Sentru Integradu Jestaun Krize (CIGC-sigla portugés) fó sai to’o tersa (21/04/2020) ohin, kazu konfirmadu surtu COVID-19 aumenta ba ema na’in 23.

Portavóz Sala Situasaun CIGC, Sergio Lobo, hateten teste laboratóriu to’o ohin hamutuk ema 361, pozitivu 23, negativu 254, provável na’in haat, hein rezultadu 80, teste foun ba ohin loron hamutuk ema na’in 24.

“Ohin loron nian teste ne’ebé ita halo liuhosi laboratóriu hamutuk 361, husi númeru ne’e iha kazu konfirmadu 23, aumenta ida kompara hanesan horiseik ba kazu ida iha Liquiça ne’ebé provável ne’e konfirmasaun mai husi Darwin dehan nia pozitivu,” informa Eis Ministru Saúde, Sergio Lobo, durante konferénsia imprensa, iha CCD, tersa ohin.

Totál abitante sei iha kuarentena hamutuk 518, no sira ne’ebé ohin sai ona husi kuarentena hamutuk 101, hosi Dili ema 83, RAEOA ema na’in 17 no Ainaro ema na’in ida.

Pasiente konfirmadu Coronavirus hamutuk ema 23 ho provável na’in haat daudaun ne’e hala’o hela tratamentu saúde iha fatin izolamentu Sentru Saúde Vera Cruz Dili.

“Agora kuarentena aumenta tan uitoan tanba ema foun tama tan, iha ema na’in 20 agora iha hela Ró laran, ema ida mak tama klandestinu agora iha hela Tibar, ita nia kolega Polisia ida mós tama kuarentena tanba nia iha kontaktu ho ema sira nia ba tula pozitivu ne’e,” tenik tan.

Sergio Lobo apresia ho kapasidade ekipa médiku iha Laboratóriu Nasionál ne’ebé halo teste ba suspeitu COVID-19 tanba rezultadu fó sai hanesan de’it ho relatóriu ikus hosi Ospitál Royál Darwin Austrália.

“Teste sira ne’ebé ita haruka ba Darwin halo konfirmasaun fila fali mai iha konkordansia 100%, entaun ita fiar duni ita-nia maluk sira ne’ebé servisu iha ita-nia laboratóriu sira halo esforsu bo’ot ida, kompara ho semana kotuk liu ba ita iha duni progresu bo’ot tebes, agora ita nia laboratóriu bele kompara ho nasaun sira avansadu,” dehan Sergio Lobo.

Pasiente COVID-19 pozitivu sira sei kontinua restritu husi grupu neen maka hanesan Grupu Otél Lecidere, Grupu Profesór iha Liquiça, Otél Katuas, Otél Fortuna, Otél Timming, no Otél Novo Horizonte.

Entretantu, iha segunda (20/04/2020), kazu konfirmadu COVID-19 hamutuk ema na’in 22, negativu 208, suspeitu 327, hein rezultadu 92, provavel na’in lima, no rekupera na’in ida.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here